हामी सबैकाे संसारन्यूज

काठमाडौं । नेपाल कम्युनिष्ट पार्टी (नेकपा)की नेतृ अष्टलक्ष्मी शाक्यले बलात्कारीलाई सजायँ गर्ने कानूनमा थप कडाई गर्नुपर्ने बेला आएको बताएकी छिन् । महिला हिंसाविरुद्व १६ दिने अभियान सुरु भएको सन्दर्भमा बोल्दै शाक्यले बलात्कारीलाई थप कडा सजायँ हुने कानून ल्याउनुपर्ने बताइन् ।

सामाजिक सञ्जालमार्फत अभियानकाबारे बोल्दै उनले मृत्युदण्ड दिने समय आएन र ? भन्ने प्रश्न राखेकी छिन् । ‘अब बलत्कारीलाई जेलसजाय मात्र होइन मृत्युदण्ड दिने समय आएन र ?’, शाक्यले भनेकी छिन्, ‘अब व्यापक बहस सुरु गरौं।’

बर्दिबासका जस्ता घटनालाई कति सहने भन्ने शाक्यको प्रश्न छ । उनले बलात्कारीलाई सजायँको नाममा जेल सम्मानपूर्वक राखिनु गलत भएको बताइन् ।

‘बलत्कारपछि हत्या गरिएका महिला र बालिका ले सम्मानपूर्वक बाँच्न पाउने संवैधानिक र नागरिक हक कहिले सम्म गुमाउनु पर्ने हो ? पीडितको आफन्तले कहिलेसम्म अमानवीय पिडा सहनुपर्ने हो ?अनि बलात्कारीले सजायको नाममा जेलमा ठाडो शिर पारेर बाँचिरहने ? बर्दिबासमा भएको जस्तो अमानवीय र विभत्स अपराधलाई कति दिन हेरि बस्ने ?’, उनको प्रश्न छ ।

नेतृ शाक्यका अनुसार नेपालमा पछिल्लो समय निरन्तर बढिरहेको महिला तथा बालिका बलात्कारको घटनाले विश्वसामु नेपाल र नेपालीको शिर निहुरिएको छ । नेपालीलाई लज्जाबोध गर्नुपर्ने अवस्था छ ।

शाक्यका अनुसार अब महिला हिंसा विरुद्वको अभियान नाराको रुपमा मात्रै सिमित गरिनु हुँदैन् । ‘अहिले महिला हिंसा विरुद्ध १६ दिने अभियान सुरु भएको छ, यसलाई नारामा मात्रै सिमित गर्नुहुँदैन’, शाक्यले भनेकी छिन्, ‘नेपालमा निरन्तर बढिरहेको महिला र बालिका बलात्कारको घटनाले विश्वसामु नेपाल र नेपालीको शिर निहुरिएको छ, कहिलेसम्म बलात्कारजस्तो जघन्य र अमानवीय घटनाले नेपालीहरुले विश्वसामु लज्जाबोध गर्नुपर्ने हो ?’