हामी सबैकाे संसारन्यूज

१५ मंसिर, काठमाडौं । कोरोना संक्रमण (कोभिड-१९) बाट विदेशमा यो साता थप ६ नेपालीको मृत्यु भएको छ ।

गैरआवासीय नेपाली संघ अन्तर्गतको स्वास्थ्य समितिका अनुसार हालसम्म विदेशका १९ मुलुकमा रहेका २९९ नेपालीको कोरोना संक्रमणका कारण मृत्यु भएको हो ।

समितका अनुसार यो साता साउदी अरबमा ४, पोर्चुगलमा १ र युकेमा १ जना गरी ६ नेपालीको कोरोना भाइरस संक्रमणका कारण मृत्यु भएको हो ।

स्वास्थ्य समितिका संयोजक डा. सन्जीव सापकोटाका अनुसार यो साता जापान, युके, स्पेन, साइप्रस, रोमानिया, कतार, यूएई र साउदी अरबमा रहेका नेपालीमा कोरोना संक्रमण देखिएको छ ।

शनिबार सााझसम्म विभिन्न ४५ मुलुकमा ४७ हजार ५ सय ८३ जना गैरआवासीय नेपाली संक्रमित भएकोमा हालसम्म ४३ हजार ५ सय ७४ जना कोरोना संक्रमणबाट मुक्त भएका हुन् । यो कुल संक्रमितमध्येको ९१ प्रतिशत रहेको छ ।