हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को सचिवालय बैठक आज बस्दैछ । बैठक दिउँसो एक बजेदेखि प्रधानमन्त्री निवास बालुवाटारमा बस्ने नेकपा स्रोतले जनाएको छ । यसअघि बैठक पार्टी केन्द्रीय कार्यालय धुम्बाराहीमा बस्ने तय भएको थियो ।

आजको बैठकमा पार्टी अध्यक्ष एवं प्रधानमन्त्री केपी शर्मा ओलीले गत शनिबारको बैठकमा पेस गरेको प्रस्तावमाथि छलफल हुनेछ । गत कात्तिक २८ मा बसेको सचिवालय बैठकमा अर्का अध्यक्ष पुष्पकमल दाहाल ‘प्रचण्ड’ले पेश गरेको प्रस्तावमाथि ओलीले जवाफी प्रस्ताव पेश गरेका थिए ।

जुन प्रस्तावमाथि यसअघि नबोलेका सचिवालय सदस्यले भनाई राख्नेछन् भने प्रचण्डले केही गम्भिर प्रकृतिका प्रश्नमाथि जवाफ दिनेछन् । प्रचण्ड निकट स्रोतले जनाएअनुसार बैठकमा मुख्यतः द्वन्द्वकालीन घटनासँग सम्बन्धित विषयमा ओलीले लगाएको आक्षेपमा प्रचण्डले जवाफ दिने तयारी गरेका छन् ।

गत कात्तिक २८ मा प्रचण्डले बहुमत सचिवालय सदस्यको सहमतीसहित प्रस्ताव पेश गरेका थिए । तर, शनिबारको बैठकमा ओलीले भने प्रचण्डलाई मात्रै आरोप लगाउँदै जवाफी प्रस्ताव अघि सारेका थिए ।

जसको जवाफ प्रचण्डले दिने तयारी गरेका हुन् । जनाइएअनुसार प्रचण्डले लिखित नै रुपमा जवाफ दिने तयारी गरेका छन् ।

साथै प्रचण्ड पक्षीय सचिवालय सदस्यहरु दुवै प्रस्तावलाई स्थायी समितिमा छलफलका लागि लैजानुपर्ने अडानमा छन् । तर, ओलीसहित नेताहरु भने प्रचण्डको प्रस्ताव खारेज गर्नुपर्ने अडानमा छन् ।