हामी सबैकाे संसारन्यूज

काठमाडौं । प्रधानमन्त्रीसमेत रहेका नेकपा अध्यक्ष केपी शर्मा ओलीले सुरक्षा थ्रेट देखाउँदै धुम्बाराही जान अस्वीकार गरेसँगै सचिवायल बैठकको स्थान परिवर्तन भएको छ । ओलीले सुरक्षा कारण देखाएसँगै बैठक प्रधानमन्त्री निवास बालुवाटारमा सारिएको हो ।

यसअघि शनिबार बसेको सचिवालय बैठकले आज बस्ने सचिवालय बैठक पार्टी केन्द्रीय कार्यालय धुम्बाराहीमा बस्ने तय गरेको थियो । तर, मंगलबार पार्टी महासचिव विष्णु पौडेलले सचिवालयका सदस्यलाई प्रधानमन्त्री निवास बालुवाटारमा बस्ने जानकारी गरेका थिए ।

आजको बैठकमा पार्टी अध्यक्ष एवं प्रधानमन्त्री केपी शर्मा ओलीले गत शनिबारको बैठकमा पेस गरेको प्रस्तावमाथि छलफल हुनेछ । गत कात्तिक २८ मा बसेको सचिवालय बैठकमा अर्का अध्यक्ष पुष्पकमल दाहाल ‘प्रचण्ड’ले पेश गरेको प्रस्तावमाथि ओलीले जवाफी प्रस्ताव पेश गरेका थिए ।

जुन प्रस्तावमाथि यसअघि नबोलेका सचिवालय सदस्यले भनाई राख्नेछन् भने प्रचण्डले केही गम्भिर प्रकृतिका प्रश्नमाथि जवाफ दिनेछन् । प्रचण्ड निकट स्रोतले जनाएअनुसार बैठकमा मुख्यतः द्वन्द्वकालीन घटनासँग सम्बन्धित विषयमा ओलीले लगाएको आक्षेपमा प्रचण्डले जवाफ दिने तयारी गरेका छन् ।

गत कात्तिक २८ मा प्रचण्डले बहुमत सचिवालय सदस्यको सहमतीसहित प्रस्ताव पेश गरेका थिए । तर, शनिबारको बैठकमा ओलीले भने प्रचण्डलाई मात्रै आरोप लगाउँदै जवाफी प्रस्ताव अघि सारेका थिए ।