हामी सबैकाे संसारन्यूज

काठमाडौं । सत्तारुढ नेकपाका स्थायी समिति सदस्य एवं लुम्बिनी प्रदेशका मुख्यमन्त्री शंकर पोखरेल नेकपाभित्रको विवादमा पार्टी अध्यक्ष केपी शर्मा ओलीको मात्रै राजीनामा मागिनु गलत भएको टिप्पणी गरेका छन् । मंगलबार पार्टी सचिवालय बैठक अगाडि उनले यस्तो टिप्पणी गरेका हुन् ।

उनका अनुसार पार्टीभित्रको समस्याको जिम्मेवार अध्यक्ष ओली मात्रै होइनन् । ओलीको मात्रै राजीनामा माग गरिनु पार्टी एकता विरोधी गुटगत मानिसकता भएको उनको भनाई छ ।

सामाजिक सञ्जालमार्फत पोखरेलले भनेका छन्, ‘पार्टीमा उत्पन्न समस्याका लागि कुनै एक अध्यक्षलाई मात्र जिम्मेवार देखाएर राजिनामाको मागगर्नु पार्टी एकता विरोधी गुटगत मानसिकता हो।’

सत्तारुढ नेकपाभित्र कार्यकारी अध्यक्ष पुष्पकमल दाहाल ‘प्रचण्ड’सहित सचिवालयका बहुमत सदस्यले ओलीको राजीनामा माग गरिरहेका छन् । कात्तिक २८ मा बसेको सचिवालय बैठक बहुमत सचिवालय सदस्यको समर्थनमा प्रचण्डले पेश गरेको राजनीतिक प्रस्तावमा पनि ओली सरकार र पार्टी सञ्चालनमा असफल भएको भन्दै राजीनामा दिनुपर्ने बताइएको छ ।

जुन प्रस्तावमाथि सचिवालयमा छलफल चलिरहेको सन्दर्भमा पोखरेलले आफ्नो भनाई राखेका हुन् ।