हामी सबैकाे संसारन्यूज

काठमाडौं । पार्टी बैठकमा जन्मदिन मनाउँदै केक काटेको प्रति नेकपाका नेता लेखनाथ न्यौपानेले विरोध जनाएका छन् । उनले बैठकमा केक काटेर जन्मदिन मनाउनु कम्युनिष्ट संस्कृतिभन्दा बाहिर भएको भन्दै विरोध जनाएका हुन् ।

नेता न्यौपानेका अुनसार पार्टी बैठकमा केक काटेर नेताहरुले कम्युनिष्ट संस्कृतिमाथि खिसिट्युरी गरेका छन् । जुन कम्युनिष्ट संस्कृतिसँग जोडिएको गम्भीर विषय भएको उनको भनाई छ ।

सामाजिक सञ्जालमार्फत उनले भनेका छन्, ‘यस्ता बिषय ब्यक्तिगत हुनै सक्दैन, अझ राजकीय जिम्मामा रहेका नामकै सही कम्युनिस्ट पार्टीका शीर्ष नेता (कोर अफ द लिडर) हरूको बिचमा । यो कम्युनिस्ट संस्कृतिसँग जोडिएको गम्भीर बिषय हो, जुन तस्बीरहरूले कम्युनिस्ट संस्कृति र पहिचानमाथि खिसिट्युरी गरेको छ ।’

मंगलबार बसेको नेकपाको सचिवालय बैठकमा पार्टी महासचिव विष्णु पौडेलले आफ्नाे जन्मदिन केक काटेर मनाएका थिए । महासचिव पौडेललाई दुवै अध्यक्षसहित नेताहरुले केक खुवाएर साथ दिएका थिए ।