Sansar News
१ पुष, नेपालगन्ज । आज कृषकलाई लक्षित गरी मोबाइल एप ‘कृषि पथ’ सार्वजनिक गरिएको छ । कृषकले उत्पादन गरेका कृषिउपजको सहज बिक्री वितरण, तरकारी बालीलगायत मौसमसम्बन्धी जानकारी कृषकले सो एपबाट पाउने बताइएको छ ।
साना तथा घरेलु उद्योग महासङ्घ बाँके शाखाले केयर नेपाल र बी–ग्रुपसँगको सहकार्यमा एप सार्वजनिक गरेको हो । घरेलु उद्योग महासङ्घ शाखा अध्यक्ष मधु खड्काका अनुसार उक्त एपको प्रयोगबारेमा बाँकेका आठवटै स्थानीय तहमा रहेका सहकारीमार्फत कृषकसम्म सूचना पु¥याउने गरी तयारी भइरहेको छ ।
इन्टरनेटको पहुँचमा नरहेका किसानलाई लक्षित गरी कल सेन्टरको पनि व्यवस्था गरिएको खड्काको भनाइ छ । बाँकेका किसानले जिल्लाको कलसेन्टर १६१६८१५२९५० मा कल गरेर एपका माध्यमबाट निःशुल्करुपमा कृषि जानकारी लिन सक्ने जनाइएको छ ।
लुम्बिनी प्रदेशका भूमि व्यवस्था कृषि तथा सहकारीमन्त्री आरती पौडेलले मोबाइल एप सार्वजनिक गर्दै प्रविधिको प्रयोग कृषिको विकास सहज हुने बताइन् । उनले विचौलियाका कारण किसानले उचित मूल्य नपाउने समस्या रहेकामा यो समस्या समाधानका लागि पनि एपले महत्वपूर्ण भूमिका खेल्ने विश्वास व्यक्त गरिन् । प्रदेश सरकारले पनि किसानलाई लक्षित गरी खजुरामा कल सेन्टर सञ्चालन गर्न लागेकाले सहकार्य र समन्वय गर्न घरेलु महासङ्घलाई मन्त्री पौडेलले आग्रह गरे । रासस file photo
वि.सं.२०७७ पुस १ बुधवार १९:०० मा प्रकाशित
