हामी सबैकाे संसारन्यूज

पौष २, काठमाडौं । उद्योग वाणिज्य तथा आपूर्तिमन्त्री लेखराज भट्टले किसानलाई पैसा नतिर्ने चिनी उद्योगीलाई पक्राउ गर्न नेताहरुले नै अवरोध गरेको बताएका छन् । बिहिबार प्रतिनिधिसभाको उद्योग वाणिज्य र श्रम तथा उपभोक्ता हित समितिमा बोल्दै मन्त्री भट्टले यस्तो बताएका हुन् ।

उनका अनुसार उखु किसानको पक्षमा बोल्ने नेताले नै चिनी उद्योगीको पक्षमा लबिङ्ग गरिरहेका छन् ।

‘सामाजिक सञ्जालमा किसानको पक्षमा भएझैं गरी नेताज्यूहरु रोइलो गर्नु हुन्छ तर भित्रभित्रै चाहिँ उद्योगीको संरक्षण गर्नु हुन्छ’, मन्त्री भट्टले भने, ‘नेताज्यूहरु मलाई फोन गरेर भन्नु हुन्छ, ‘३–४ दिनमै तिर्छु भनेका छन्, अहिले पक्राउ नगरिदिनुस् है’ । फेरि ट्विटरमा चाहिँ उहाँहरु नै सरकारकै विरोध गरेर किसानलाई पैसा किन नदिएको भन्नुहुन्छ । अच्चम छ । यस्तो दोहोरो चरित्रले किसानको हित हुँदैन,’ मन्त्री भट्टले भने ।

मन्त्री भट्टले कुन नेताले कुन उद्योगको पक्षमा फोन गरेको भने खुलाएका छैनन् ।