हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)भित्र विवाद चर्किरहेको बेला सभामुख अग्निप्रसाद सापकोटाविरुद्वको मुद्दामा सर्वोच्च अदालतले पेशी तोकेको छ । सापकोटाविरुद्वको मुद्दा प्रधानन्यायाधीश चोलेन्द्रशमशेर जबरा, दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठको संवैधानिक इजलासमा परेको हो ।

प्रधानमन्त्री केपी शर्मा ओलीले बोलाएको संवैधानिक परिषदको बैठकमा सभामुख सापकोटाले केहि अडान राख्दै जान अस्वीकार गरेका थिए । नेकपाका कार्यकारी अध्यक्ष पुष्पकमल दाहाल ‘प्रचण्ड’ निकट मानिने सापकोटाले बैठकमा जान अस्वीकार गरेसँगै अर्का अध्यक्षसमेत रहेका ओली निकै चिढिएका थिए ।

यसअघि २०७६ फागुन ३०मा यो मुद्दा पेशीमा चढाइएको थियो । तर, हेर्न नभ्याउने भन्दै मुद्दाको सुनुवाई सरेको थियो ।

काभ्रेका अर्जुन लामाको हत्यामा सापकोटाको हात रहेको भन्दै उनकी पत्नी पूर्णीमाया लामाले २०६९ मंसिर ७ मा रिट दायर गरेकी थिइन् । यो मुद्दा विचाराधिन अवस्थामा थियो । हालसम्म यो मुद्दामा १९ पटकसम्म सुनुवाईको पेशी तोकिएको छ ।