हामी सबैकाे संसारन्यूज

५ पुष, काठमाडौँ । प्रगतिशील रुपान्तरण आन्दोलन, नेपालले प्रधानमन्त्रीको संसद विघटनको कदम संविधान विरुद्धको अघोषित ‘राजनीतिक कू’ भएको जनाएको छ ।

संयोजक श्याम श्रेष्ठद्वारा वक्तव्यमा प्रधानमन्त्री केपी ओलीको संसद बिघटन गर्ने आजको कदम यो निर्णय समाजवादउन्मुख लोकतान्त्रिक गणतन्त्र र नेपालको संविधान बिरुद्धको अघोषित राजनीतिक कू भएको जनाइएको छ । बहुमत कायम रहेको प्रधानमन्त्रीलाई संसद बिघटन गर्ने सुविधा नेपालको संविधानले कहिँकतै प्रदान नगरेको भन्दै यस कदमलाई प्रतिगमनतर्फको यात्रा भनिएको छ ।

यो कदमले नेपालले २०५१ सालको नेपाल जस्तै देशलाई निरन्तर राजनीतिक अस्थिरतातर्फ धकेल्ने जनाउँदै इतिहासले अक्षम्य महाभूल र राजनीतिक पटमूर्खताको पराकाष्ठाको रुपमा स्मरण गर्ने वक्तव्यमा उल्लेख छ ।

‘संसदमा झण्डै दुई तिहाइ बहुमत रहेको एउटा ‘बामपन्थी’ दलले खुरुखुरु आफ्ना चुनावी घोषणापत्रमा लेखिएका रुपान्तरणकारी काम गर्नुको सट्टामा एकपछि अर्को आफ्नै प्रतिवद्धताविरोधी, जनविरोधी र भ्रष्ट काम गरेर अहिले जुन संसद बिघटनसम्मको निर्णयमा पुगेको छ त्यसलाई इतिहासले अक्षम्य महाभूल र राजनीतिक पटमूर्खताको पराकाष्ठाको रुपमा स्मरण गर्नेछ । ’

प्रधानमन्त्रीको कदमका विरुद्ध देशभरिका सबै राजनीतिक दलहरू, नेकपाकै केन्दिय समिति र नागरिक शक्ति एक भएर सडकमा ओर्लन तथा यो अंवैधानिक कदमको प्रतिवाद गरी यसलाई उल्ट्याउन जरुरी रहेको पनि वक्तव्यमा जनाइएको छ ।