हामी सबैकाे संसारन्यूज

५ पौष, मेलम्ची । रेडियो मेलम्चीको भवन निर्माणका लागि युवा व्यवसायी जनकलाल श्रेष्ठले दुई लाख पाँच हजार उपलब्ध गराएका छन् । पाँचपोखरी थाङ्पाल गाउँपालिका– ६ का स्थायी बासिन्दा उनी हाल मेलम्चीमा विविध व्यवसायमा संलग्न छन् ।

समुदायको सक्रियतामा बनिरहेको सो भवन निर्माणका लागि हालसम्म १८६ जनाबाट १६ लाख रुपैयाँभन्दा बढी रकम प्राप्त भइसकेको छ । निर्वाचन क्षेत्र विकास कोष, मेलम्ची नगरपालिका, इन्द्रावती, हेलम्बु, पाँचपोखरी थाङपाल गाउँपालिका, ह्योल्मो समितिलगायतका संस्थाले भवनका लागि आर्थिक सहयोग उपलब्ध गराएको रेडियो सञ्चालन समितिका अध्यक्ष डम्बर रसिक भारतीले जानकारी दिए ।

अवस्था सामान्य रहेमा अबको दुई महिनाभित्र नयाँ भवनबाट प्रसारण थालिने पनि अध्यक्ष भारतीले बताएका छन्। सङ्ग्रहालय, पुस्तकालय, सूचना केन्द्रसमेत राखिने सो बहुद्देश्यीय भवन निर्माणका लागि करिब ७० लाख रुपैयाँ लाग्ने बताइएको छ । यसका लागि रकम अभाव भएको हुँदा विभिन्न पालिका, सङ्घसंस्था तथा सहयोगी, शुभचिन्तकलाई सहयोगका लागि आह्वान गरिएको छ । रासस