हामी सबैकाे संसारन्यूज

५ पुष, काठमाडौँ । संसद् विघटन भए लगत्तै नेपाली सेनाले प्रमुख सैनिक अधिकृतहरु (पीएसओज) लाई बोलाएर सुरक्षा बैठक गरेको छ ।

प्रधानमन्त्री केपी शर्मा ओलीले मन्त्रीपरिषद्बाट संसद विघटन गर्ने प्रस्ताव अघि बढाएसँगै नेपाली सेनाले आफ्नो मुख्यालय जंगी अड्डा भद्रकालीमा पीएसओजको बैठक बोलाए उक्त कदमपछि मुलुकमा पर्न सक्ने सुरक्षा चुनौती र प्रभावहरुको विषयमा छलफल गरेको हो ।

प्रधान सेनापति पूर्णचन्द्र थापाले आजै सबै प्रदेशका पृतनापतिहरुसँग भिडियो कन्फरेन्समार्फत हरेक प्रदेश र क्षेत्रको सुरक्षाको अवस्थाबारे जानकारी लिएको नेपाली सेनाका प्रवक्ता सन्तोषबल्लभ पौडेलले बताए ।

बैठकमा मुलुकको पछिल्लो घटना क्रम र उत्पन्न हुनसक्ने सुरक्षाको विषयमा छलफल भएको थियो । नेपाली सेनाको चासो सुरक्षासँग मात्र रहेको बताउँदै प्रवक्ता पौडेलले संवैधानिक र राजनीतिक विषयमा सेना निरपेक्ष रहने बताए ।

बैठक नियमित प्रक्रिया भएको जनाउँदै उनले भने,‘नयाँ घटनाक्रमबाट उपत्पन्न हुन सक्ने सुरक्षा चुनौती नै हाम्रो चासो हो । अन्य राजनीतिक र संवैधानिक कुराको विषयमा हाम्रो चासो भएन ।’