Sansar News
काठमाडौं । अख्तियार दुरुपयोग अनुसन्धान आयोगको प्रमुख आयुक्तमा प्रेमकुमार राई सिफारिस भएका छन् । जसबारेको पत्रका आइतबार संसद विघटनसँगै संसद सचिवालयमा पुगेको छ ।
संवैधानिक परिषदका सदस्यसमेत रहेका राष्ट्रिय सभा अध्यक्ष गणेश तिमिल्सिनाका अनुसार मंसिर ३० मा बसेको परिषदको बैठकले उनलाई नियुक्तीको निर्णय गरेको हो । उनका अनुसार उक्त बैठकले सबै जसो संवैधानिक निकायमा नियुक्तीको निर्णय गरेको थियो ।
‘३० गतेकै बैठकले गरेको निर्णय हो, त्यसपछि बैठक बसेको छैन्’, तिमिल्सिनाले संसार न्यूजसँगको कुराकानीमा भने, ‘उक्त दिन सबैजसो रिक्त संवैधानिक निकायमा नियुक्तीको निर्णय भएको थियो ।’
उनका अनुसार जसबारेको निर्णय प्रधानमन्त्रीसमेत रहेका संवैधानिक परिषदका अध्यक्ष केपी शर्मा ओलीले सार्वजनिक नगरी राखेका थिए । ‘हामी निर्णय गरेर हिँड्यौं, अध्यक्षले त्यसलाई सार्वजनिक पछि गर्ने भनेर राख्नुभएको थियो होला, त्यैभर आज सार्वजनिक भएको हो’, उनले भने ।
अख्तियार प्रमुखमा सिफारिस भएका राई पूर्वसचिव हुन् । उनी झण्डै एक वर्षअघि सचिवबाट अवकास भएका थिए ।
वि.सं.२०७७ पुस ५ आइतवार १५:३८ मा प्रकाशित
