Sansar News
६ पुष । भारतले जनवरीदेखि कोभिड १९ विरुद्धको खोप दिन सुरु गर्ने भएको छ ।
कोरोनाको तेस्रो लहर सुरु भएको भन्दै सबैलाई सर्तक रहन भनिएकै बेला स्वास्थ्य मन्त्री डा हर्षवर्धनले जनवरीको कुनै पनि हप्ताबाट खोप दिन सुरु गरिने जानकारी गराएका हुन् । स्वास्थ्य मन्त्री हर्षवर्धनका अनुसार जनवरीको कुनै पनि हप्तामा भारत कोरोना खोप दिने अवस्थामा हुनेछ।
मन्त्री हर्षवर्धनले सरकारको पहिलो प्राथमिकता खोपको सुरक्षा र प्रभावकारिता भएको जनाउँदै सरकारले खोपका सन्दर्भमा कुनै हतार नगरेको स्पष्ट पारेका छन् ।
भारतमा तीन कम्पनीको खोप ल्याउने चर्चा छ । खोप आएसँगै सुरुवाती चरणमा कसकसलाई लगाउने भन्ने बारे केन्द्रीय स्वास्थ्य मन्त्रालयले राष्ट्रिय भ्याक्सिन विज्ञको सिफारिसको आधारमा ३० करोड भारतीयलाई ३ चरणमा बाँडेको छ ।
पहिलो चरणमा स्वास्थ्यकर्मी समूहः यसमा स्वास्थ्य सेवासँग जोडिएका एक करोड कर्मचारी सामेल हुने छन् । दोस्रो चरणमा अग्रपंक्तिमा रहेर काम गर्ने केन्द्र तथा प्रदेशमा कार्यरत पुलिस, सैनिक, आपतकालिन सेवामा जोडिएका २ करोड कर्मचारी र तेस्रो चरणमा ५० वर्ष माथिका २७ करोड नागरिक र गम्भिर रोगबाट पीडितहरुलाई जसलाई कोरोनाको बढी प्रभाव हुन्छ उनीहरुलाई प्राथमिकता दिने बताइएको छ ।
वि.सं.२०७७ पुस ६ सोमवार १७:१५ मा प्रकाशित
