Sansar News
६ पुष, काठमाडौँ । संसद विघटनका विषयलाई लिएर नेपाल बार एशोसिएनका पदाधिकारीभित्रै विवाद देखिएको छ ।
प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले संघीय संसदको प्रतिनिधिसभा विघटन गरेपछि त्यसलाई हेर्न दृष्टिकोणलाई लिएर बारका महासचिव अधिवक्ता लिलामणि पौडेलद्वारा विज्ञप्ति जारी भैसकेपछि अपरान्ह कोषाध्यक्ष रुद्रप्रसाद पोख्रेलले पुनः अर्को विज्ञप्ति जारी गरेपछि बारभित्र विवाद देखिएको हो ।
कोषाध्यक्ष पोख्रेलले महासचिवले जारी गरेको विज्ञप्ति केन्द्रीय सचिवालय तथा केन्द्रीय समितिको समेत सहमति नरहेको भन्दै अर्को विज्ञप्ति जारी गरेपछि संसद विघटनका विषयमा बार पदाधिकारीभित्रको विवाद सतहमा आएको छ ।
महासचिव पौडेलद्वारा जारी विज्ञप्तिमा अन्य विकल्प हुँदाहुँदै प्रधानमन्त्रीले नेपालको संविधानको प्रावधान विपरित प्रतिनिधि सभा विघटन गर्नुपर्ने कुनै कारण र आधार नभएको भन्दै विरोध जनाइएको छ भने कोषाध्यक्ष पोख्रेलले घुमाउरो पाराले प्रधानमन्त्रीको कदमलाई स्वागत गरेका छन् ।
दुई छुट्टाछुट्टै विज्ञप्ति जारी भएसँगै जनमानसमा भ्रम सिर्जना भएपछि अध्यक्ष चण्डेश्वर श्रेष्ठले पुनः अर्को विज्ञप्ति जारी गरी आधिकारीक धारणा सार्वजनिक छन् । उनले महासचिवको विज्ञप्ति नै आधिकारिक भएको भन्दै कोषाध्यक्षद्वारा जारी विज्ञप्तिको भ्रममा नपर्न सबैसँग आग्रह गरेका छन् । २६ जना रहेको कार्यसमितिमध्ये १९ जनाको सहमतिबाटै महासचिवले विज्ञप्ति जारी गरेको स्पष्ट पार्दै उनले कोषाध्यक्षद्वारा जारी विज्ञप्तिको भ्रममा नपर्न आग्रह गरेका हुन् ।
वि.सं.२०७७ पुस ६ सोमवार २१:५८ मा प्रकाशित
