Sansar News
पुस ८, काठमाडौं । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले संसदलाई पुनर्स्थापित गरेरै छाड्ने बताएका छन् । बुधबार आफुँ पक्षीय संसदीय दलको बैठकपछि पत्रकारसँगको कुराकानीमा उनले यस्तो बताएका हुन् ।
‘‘संसदीय दलले मलाई दल नेताको रुपमा सर्वसम्मतीले चयन गरेको छ, मैंले निकै ठूलो चुनौतिको समयमा यो जिम्मेवारी पाएको छु’, पत्रकारसँगको कुराकानीमा प्रचण्डले भने, ‘संसदलाई जिवित तुल्याउनु र राष्ट्र र जनताको अपेक्षाअनुसारको काम गर्ने गरि नयाँ सरकार गठन गर्नेतिर मेरो ध्यान हुन्छ ।’
उनले संसद पुनस्र्थापना र सरकार गठनका लागि मुद्दा मिल्ने अन्य दलसँग पनि सहकार्य गर्ने बताए ।
बुधबार बसेको प्रचण्ड–नेपाल पक्षीय संसदीय दलको बैठकले उनलाई संसदीय दलको नेताको रुपमा सर्वसम्मत चयन गरेको थियो । यसअघि एकिकृत दलको नेताको रुपमा प्रधानमन्त्री केपी शर्मा ओली थिए । तर, मंगलबार बसेको प्रचण्ड–नेपाल पक्षीय केन्द्रीय समितिको बैठकले ओलीलाई पार्टीबाट हटाउने निर्णय गरेको थियो ।
मंगलबारको केन्द्रीय समिति बैठकले ओलीलाई हटाउँदै नयाँ नेता चयन गर्न संसदीय दलको बैठक बोलाउने निर्णय गरेको थियो । सोही निर्णयअनुसार आज बैठक बसेको हो ।
आज बसेको प्रचण्ड–नेपाल पक्षको संसदीय दलको बैठकमा ११५ जना सांसदको उपस्थिति थियो । जसमध्ये ९३ सांसद प्रतिनिधि सभाका रहेको उक्त पक्षले बताएको छ ।
वि.सं.२०७७ पुस ८ बुधवार १५:४९ मा प्रकाशित
