हामी सबैकाे संसारन्यूज

१५ पुस, काठमाडौं । प्रधानमन्त्री केपी शर्मा ओलीले संसद विघटन गरेसँगै नेपाल कम्युनिष्ट पार्टी (नेकपा) मा देखिएको विवादका बिच नेपाल आएको चिनियाँ कम्युनिष्ट पार्टीको टोली बुधबार चीन फर्किएको छ ।

चारदिने नेपाल भ्रमणका लागि एयर चाइनाको विमान चार्टड गरेर नेपाल आएको सो टोली हिमालयन एयरलाईन्सको नियमित उडानबाट चीन स्वदेश फर्किएको बताइएको छ ।

चिनियाँ कम्युनिष्ट पार्टीको अन्तराष्ट्रिय विभाग उपमन्त्री कुओ यैचौको नेतृत्वमा आइतबार नेपाल आएको चार सदस्यीय उक्त टोलीले नेपालमा रहँदा राजनीतिक भेट गरेका थियो ।

भेटका क्रममा राष्ट्रपति विद्यादेवी भण्डारी, प्रधानमन्त्री केपी शर्मा ओली तथा नेकपाका अध्यक्ष पुष्पकमल दाहाल ‘प्रचण्ड’, माधव कुमार नेपाल, सोहि पार्टीका नेता झलनाथ खनाल, नेपाली कांग्रेसका सभापति शेर बहादुर देउवा, जनता समाजवादी पार्टी नेपालका संघीय परिषद् अध्यक्ष तथा पूर्वप्रधानमन्त्री बाबुराम भट्टराईसँग भेटवार्ता गरेको थियो ।

नेकपामा देखिएको फुट लगत्तै एकताको शुभेच्छा बोकेर नेपाल आएको बताइएको उक्त टोलीका विषयमा विभिन्न विश्लेषण गरिएका छन् । केहीले नेपालको आन्तरिक मामिलामा हस्तक्षेप भएको भनेका छन् भने केहीले नेकपासँगको भाइचारासँगको सम्बन्धमा ऐक्यबद्धता प्रकट गर्न आएको बताइएको छ । चिनियाँहरु नेपालको आन्तरिक मामिलामा हस्तक्षेप गर्न नभइ विदेशीहरुको बढ्दो हस्तक्षेप अध्ययन गर्न नेपाल आएको चिनियाँ श्रोतले बताएको छ ।  कोरोना महामारीका बिचमा नेपाल आएको उक्त टोलीले स्वास्थ्य सुरक्षाको मापदण्ड अपनाएको थियो ।