हामी सबैकाे संसारन्यूज

पुस १७, काठमाडौं । राष्ट्रिय सभा सदस्य दिनानाथ शर्माले आफ्नो मुटु फुटेको, चिरिएको बताएका छन् । शुक्रबारदेखि सुरु राष्ट्रिय सभाको बैठकलाई सम्बोधन गर्दै पार्टी विभाजनको घटनाले आफ्नो मुटु चिरिएको बताए ।

‘पार्टी विभाजन भएको र प्रतिनिधि सभा विघटन भएको राष्ट्रिय राजनीतिको यस घडिमा हामी राष्ट्रिय सभामा उपस्थित भएका छौं’, राष्ट्रिय सभामा बोल्दै शर्माले भने, ‘पार्टी विभाजनको यो संघारमा आउँदा खेरि मैंले मेरो मुटु फुटेको, मुटु चिरिएको अनुभव गरेको छु ।’

शर्माले आफ्नो राजनीतिक जीवनमै नेकपा विभाजनले निकै पीडा अनुभव गरेको बताए । ‘विगतका फुटहरुमा यति दुःख मैंले अनुभूति गरेको थिइन् तर, यसले अहिले निकै पीडा भएको छ’, उनले भने ।

उनले आफ्नो पार्टी विभाजित भएपनि औपचारिक विभाजन भईनसकेको बताए । ‘हाम्रो पार्टी विभाजित भएको छ, विभाजनको संघारमा छ, यद्यपी विभाजनको घोषणा नभएपनि पार्टी विभाजनको संघारमा छ’, उनले भने ।

शर्माले नेता बामदेव गौतम पार्टी एकतालाई जोड्न अझैपनि प्रर्यत्नशील रहेको भन्दै उनीप्रति कृतज्ञता व्यक्त गरे । शर्माले बामदेव गौतमलाई उनको लक्ष्यप्रति शुभकामना पनि दिएका छन् ।