हामी सबैकाे संसारन्यूज

१९ पुस, काठमाडौं । नेपाल आयल निगम नयाँ सुधारका योजनाहरुका साथ अघि बढ्दै छ । निगम पछिल्लो पाँच वर्षदेखि निरन्तर नाफामा रहेको छभने अझै सुधारको योजनाहरु सहित अगाडी बढ्दै  छ ।

निगम मोतीहारी–अमलेखगञ्ज पेट्रोलियम पाइपलाइनको सफलतापछि अझै बढी नाफामा जाने देखिएको छ । गत वर्षदेखि सञ्चालनमा ल्याएको पाइपलाइनबाट साढे एक अर्ब रूपैयाँ निगमले बचत गरेको छ । पाइपलाइनको सफलतासँगै निगमले हाल मुख्य ६ योजनाहरु अघि सारेर काम अगाडी बढाइरहेको छ ।

निगमका प्रवक्ता विनितमणी उपाध्यायका अनुसार निगमले जनकपुरमा एलपीजी ग्यासका लागि भण्डार गृह बनाउने गयारी पनि थालेको छ । एलपी ग्यासको भण्डारण गृह नरहेको हालको अवस्थालाई मध्यनजर गर्दै अर्को महत्वपूर्ण योजना अघि सारेको हो । योसँगै निगमले पोखरामा ५-५ हजार किलोलिटरको दुई फ्युल डिपोको निमार्ण कार्य यसअधिनै सुरु गरिसकेको छ ।

निगम नेपालको एकमात्र इन्धन आयातित कम्पन्नी भएकाले उसले आफ्नो कार्यलयलाई समय सापेक्ष रुपमा पप्डेट गर्दै लाने उद्देश्यले अत्याधुनिक आधुनिक कर्पोरेट अफिस बनाउने योजना पनि निगमको रहेको छ । त्यस्तै निर्माणको चरणमा रहेका दुई राष्ट्रिय गाैरवको आयोजना पोखरा र गौतमवुद्ध विमानस्थलमा आधुनिक हवाइ इन्धन डिपो बनाउने तयारीमा रहेको छ ।

गतवर्षबाट संचालनमा आएको पाइपलाइनबाट साढे एक अर्ब बचत गरेको निगम अब अमलेखगञ्जको पाइपलाइनलाई चितवनसम्म विस्तार गर्ने र सिलगुडीबाट झापासम्म अर्को अन्तरदेशीय पाइपलाइन निमार्ण गर्ने गृहकार्यमा रहेकाे छ । यसको सुरुवात स्वरुप निगमाले सिलगुडीबाट झापासम्मको रुट पहिचानको लागि सर्वे समेत गरिसकेको छ ।

समय सापेक्ष सुचना प्रविधिको विस्तार गर्दै लग्ने योजनाका साथ निगमले अटोमेशनको काम पनि अगाडि बढाएको छ ।

लगातार पाँच वर्षदेखि नाफामा

लामो समयदेखि घाटामा रहेको निगम आर्थिक वर्ष २०७२/०७३ देखि  लगातार पाँच वर्ष नाफामा सञ्चालन भइरहेको छ । निगमले आव २०७२/७३ मा रु १९ अर्ब ३६ करोड, आव २०७३/७४ मा रु नौ अर्ब ४५ करोड, २०७४/७५ मा रु तीन अर्ब ५८ करोड, २०७५/७६ मा आठ अर्ब ७५ करोड र गत आव २०७६/७७ मा रु १२ अर्ब ८७ करोड नाफा कमाएको छ ।