Sansar News
२० पुष, काठमाडौं । नेपालको राजनीतिक घटनाक्रमका कारण रोकिएको नेपाल र भारतबीच परराष्ट्रमन्त्री स्तरीय बैठक हुने भएको छ ।
सेप्टेम्बरको दोस्रो साताका लागि बैठक हुने तय भएपनि नेपालको पछिल्लो राजनीतिक घटनाक्रमका कारण रोकिएको थियो । जनवरी १४ अर्थात् गते दुईदेशका परराष्ट्रमन्त्रीहरुको बैठक बस्ने तयारीमा दुबै देशका सरकार लागिपरेको परराष्ट्र मन्त्रालयले जनाएको छ ।
दुवैतर्फबाट बैठकको तयारी पुरा भएको पनि मन्त्रालयले जनाएको छ । मन्त्रीस्तरीय बैठकका लागि परराष्ट्रमन्त्री प्रदीप ज्ञवाली जनवरीको दोस्रो साता भारतको राजधानी दिल्ली जाने भएका छन् । यद्यपि बैठकको तिथि अझै औपचारिक रूपमा सार्वजनिक गरिएको छैन ।
यसअघि नेपालले लगातार आग्रह गरेपनि भारत बैठकका लागि तयार बनेको थिएन । नेपालमा प्रतिनिधिसभा विघटनबारे औपचारिक धारणा सार्वजनिक नगरेको भारतले कामचलाउ बनेको सरकारसँग बैठक बस्न तयार हुनुलाई आशंकाको दृष्टिले हेरिएको छ ।
वि.सं.२०७७ पुस २० सोमवार १८:५८ मा प्रकाशित
