Sansar News
पुस २२, काठमाडौं । संसद विघटनबारेको मुद्दा सर्वोच्च अदालतमा बहसका क्रममा रहेको बेला एकाएक संविधान सभाका अध्यक्षसमेत रहेका प्रधानमन्त्री ओली पक्षीय नेकपाका नेता सुवासचन्द्र नेम्वाङको पुरानो भिडियो भाइरल बनेको छ । संसदीय पत्रकारको ट्विटर एकाउण्ट (@jspanepal)बाट सार्वजनिक भिडियोमा नेम्वाङले संसद प्रधानमन्त्रीले विघटन गर्न नसक्ने भनेका छन् ।
‘अहिलेका प्रधानमन्त्रीले संसद विघटन गर्न सक्दैनन्, संविधानमा यो व्यवस्था छैन, पत्रकारले समाचार लेख्दा हेक्का राख्नुपर्छ’, सार्वजनिक भिडियोमा उनले भनेका छन् ।
संसद विघटनपश्चात भने उनले संसद विघटन गर्न पाईने कि नपाईने भन्ने हालसम्म कुनै अभिव्यक्ति दिएका छैनन् । विघटनको विषय अदालती भएको भन्दै नेम्वाङले बोल्न इन्कार गर्दै आएका छन् । बोल्न इन्कार गरिरहेका बेला भिडियो भाइरल बनेको हो ।
सार्वजनिक भिडियो २०७६ साल साउन ४ गते धुलिखेलमा युएनडिपी र संसद सचिवालयले आयोजना गरेको अन्तरसंवादको भिडियो हो ।
यस्तो छ भाइरल बनेको नेम्वाङको भिडियो
वि.सं.२०७७ पुस २२ बुधवार १४:४८ मा प्रकाशित
