Sansar News
२३ पुस। अमेरिकीमा राष्ट्रपति डोनाल्ड ट्रम्पका समर्थकहरुले वाशिङ्टनस्थित संसद भवन (क्यापिटल बिल्डिङ)मा प्रवेश गरी हिंसा मच्याएका छन् ।
अमेरिकी कङ्ग्रेसमा सांसदहरूले जो बाइडनको जितको कानुनी पुष्टि गर्न छलफल गरिरहेका बेला ट्रम्पका सयौँ समर्थकहरु जर्बजस्ती संसदमा छिरेका थिए । प्रदर्शनकारी क्यापिटल बिल्डिङ भित्रै प्रवेश गरेर अमेरिकी राष्ट्रपति चुनाव रद्द गर्न माग गर्न थाले । रोक्ने क्रममा भएको भिडन्तमा एक प्रदर्शनकारी महिला मारिएकी छन् ।
छातिमा गोली लागेकी असिल बबिट नाम गरेकी ती महिला सान डियागोको नागरिक भएको समेत पहिचान भएको छ । उनका पतिका अनुसार बबिट एयर फोर्समा उच्च सुरक्षा अधिकारीको रुपमा १४ वर्ष काम गरेकी थिइन ।
करिब तीन घण्टाको तोडफोड र हिंसात्मक प्रदर्शनपछि अहिले स्थिति नियन्त्रणमा आएपनि राजधानी वाशिङ्टन डिसीमा कफ्र्यू लगाइएको छ ।
घटनामा दर्जनौं प्रहरीहरू पनि घाइते भएका छन् । सुरक्षा अधिकारीहरूले हिंसा फैलिएका ठाउँमा एउटा पाइप बमसमेत भेटिएको छ ।
ट्रम्पले गत नोभेम्बर ३ मा भएको चुनावको मतपरिणामलाई अस्वीकार गरिरहेका छन् । उनले कुनै प्रमाणविनै चुनावमा धाँधली भएको आरोप लगाउँदै आएका छने । ट्रम्प समर्थकहरूले चुनावी परिणाम रद्द गर्न माग गर्दै प्रदर्शन गरिरहेका थिए ।
तस्विर स्रोत : डेलीमेल
वि.सं.२०७७ पुस २३ बिहीवार ०९:१२ मा प्रकाशित
