हामी सबैकाे संसारन्यूज

२६ पुस, काठमाडौं । राष्ट्रियसभाका सदस्य सांसद प्रकाश पन्तले प्रधानमन्त्री केपी शर्मा ओलीलाई गेस पेपर नपढेर संविधान पढ्न सुझाव दिएका छन् ।

आइतबार राष्ट्रिसभामा प्रधानमन्त्रीको सम्बोधन पश्चात दिइएको एक मिनेटको समयमा नेपाली कांग्रेसका सांसद प्रकाश पन्तले संविधान च्यातेर निर्वाचन कसरी हुन्छ ? त्यो त नहर भत्काएर रोपाइँ गर्न जा भनेजस्तो भएन र भन्ने प्रश्न गरेका थिए ।

‘मृत्यु पर्यन्त आँखा दान गरेको यो त मर्ने चिज रहेछ भनेर त्यसलाई मारेरै आँखा निकालियो । संसदको विघटन पनि यस्तै भयो । संविधान च्यातेर निर्वाचन कसरी हुन्छ ? नहर भत्काएर रोपाइँ गर्न जा भनेजस्तो भएन, नहर नबनेसम्म रोपाइ हुन सक्तैन । संविधान बाँचे चुनाबमा जाउँला, चुनाव त राजाले पनि गर्छु भनेका थिए । जमिन खोजेको चित्र बाड्नु भयो, चुच्चे जमिन ल्याउन नसकेर संसद भंग गर्नु भएको हो ? जतिसुकै तर्क गरे पनि संसद विघटन अलोकतान्त्रिक र असंबैधानिक छ । गेस पेपर पढेर भएन प्रधानमन्त्रीज्यू संविधान पढ्नु पर्यो ।’ उनले प्रश्न गर्ने क्रममा भनेका थिए ।

उक्त क्रममा सांसद पन्त, जितेन्द्र नारायण देव, प्रमिला कुमारी र रमेशजंग रायमाझीले प्रधानमन्त्रीको सम्बोधन पश्चात प्रश्न गरेका थिए ।