Sansar News
पुस २६, काठमाडौं । राष्ट्रिय सभाको हिउँदे अधिवेशन आज अन्त्य भएको छ । मन्त्रिपरिषदको सिफारिसमा राष्ट्रपति विद्यादेवी भण्डारीले अधिवेशन अन्त्य गरेकी हुन् ।
नेपालको संविधानको धारा ९३ को २ बमोजिम मन्त्रिपरिषद्को सिफारिसमा चालू अधिवेशन पुष २६ गते आइतबारको दिन राति १२ बजेदेखि लागू हुने गरी अधिवेशन अन्त्य गरेको राष्ट्रपति कार्यालयले जनाएको छ।
‘नेपालका संविधानको धारा ९३ को उपधारा (२) बमोजिम नेपाल सरकार, मन्त्रिपरिषदको मिति २०७७।०९।२६ को सिफारिसमा राष्ट्रिय सभाको चालु अधिवेशन संवत २०७७ साल पुस २६ गते आइतबारका दिन राती १२ः०० बजेदेखि अन्त्य गरेको छु’, राष्ट्रपति कार्यालले जारी गरेको सूचनामा भनिएको छ ।
आइतबार बसेको मन्त्रिपरिषदको आकस्मिक बैठकले अधिवेशन अन्त्य गर्न राष्ट्रपतिलाई सिफारिस गर्ने निर्णय गरेको थियो । सोही बमोजिम राष्ट्रपतिले अन्त्य गरेकी हुन् ।
यसअघि राष्ट्रिय सभा बैठकमा प्रधानमन्त्री केपी शर्मा ओलीले सम्बोधन गरेका थिए । जसपश्चात अधिवेशन अन्त्य गरिएको हो ।
वि.सं.२०७७ पुस २६ आइतवार १५:१३ मा प्रकाशित
