Sansar News
१ माघ, काठमाडौं । आज देखि बैंक तथा वित्तिय संस्थाका ग्राहकले अन्तर बैंक एटिएम कारोबार गर्दा शुल्क लाग्ने भएको छ । यो व्यवस्था अनुसार बैंकहरुले माघ १ गते, विहिबार देखि अन्तर बैंक एटीएम कारोबारमा शुल्क लिन पाउने भएको हो ।
कोभिड संक्रमणको जोखिमबाट बच्च भन्दै सरकारले लकडाउन सुरु गरेदेखि (गत चैतमा) बैंक तथा वित्तीय संस्थामा एउटा बैंकको कार्डले अर्को बैंकको एटीएम मेसिनबाट पैसा निकाल्दा शुल्क नलाग्ने व्यवस्था गरेको थियो ।
एक बैंक तथा वित्तीय संस्थाले जारी गरेका एटीएम कार्ड अन्य बैंक तथा वित्तीय संस्थाको एटीएम काउन्टरमा प्रयोग गर्दा मासिक २ वटा कारोबारमा शुल्क लाग्ने छैन । तर, मासिक २ कारोबार भन्दा धेरैमा प्रति कारोबार २० रुपैयाँका दरले तिर्नुपर्ने व्यवस्था केन्द्रीय बैंकले गरेको छ ।
बैंकका अनुसार बैंक तथा वित्तीय संस्थाको एटीएम काउन्टरमा प्रयोग गर्दा अझै पनि मासिक २ वटासम्म अन्तर बैंक एटीएम कारोबार ग्राहकले निःशुल्क गर्न पाउने छन् । दुई वटा भन्दा धेरै कारोबारको हकमा प्रति कारोबार २० रुपैयाँसम्म शुल्क उठाउन पाउने व्यवस्था राष्ट्र बैंकले गरेको जनाएको छ ।
वि.सं.२०७७ माघ १ बिहीवार १३:४१ मा प्रकाशित
