Sansar News
माघ ५, काठमाडौं । प्रदेश १ का मुख्यमन्त्री शेरधन राईविरुद्व अविश्वासको प्रस्तावमा हस्ताक्षर गरेका नेकपाको प्रचण्ड–नेपाल पक्षका तीन सांसदले हस्ताक्षर फिर्ता गर्ने भएका छन् । प्रदेश १ को सामाजिक विकास राज्यमन्त्री पदबाट राजीनामा दिएर अविश्वासको प्रस्तावमा हस्ताक्षर गरेकी जसमाया गजमेरसहित ३ जनाले फिर्ता गर्न लागेका हुन् ।
हस्ताक्षर फिर्ता गर्न लागेकामा गजमेरसहित गोपालचन्द्र बुढाथोकी र श्रीप्रसाद मैनाली छन् । जनाएअनुसार उनीहरुले सोमबार नै औपचारिक रुपमा हस्ताक्षर फिर्ता लिनेछन् ।
यसअघि उदयपुरकी सांसद कला घले र मोरङकी सांसद बसन्तीदेवी यादवले पनि हस्ताक्षर फिर्ता लिएका थिए ।
याे पनि पढ्नुहाेस्
नेकपा विभाजनसँगै प्रचण्ड–नेपाल पक्षका ३७ सांसदले मुख्यमन्त्री राईविरुद्व गत पुस १२ मा अविश्वासको प्रस्ताव दर्ता गरेका थिए । तर, यसबीच ३२ सांसद मात्रै अविश्वासको पक्षमा देखिएका छन् ।
९३ सदस्यीय प्रदेशसभामा ६७ सांसद नेकपामा छन् । जसमध्ये ३२ सांसद प्रचण्ड–नेपाल पक्षमा देखिएका छन् भने हस्ताक्षर फिर्तासँगै ३५ सांसद ओली पक्षमा देखिएका छन् ।
अविश्वासको प्रस्ताव दर्ता भएसँगै सरकार अल्पमतमा परेको थियो । प्रदेश १ मा सरकार बनाउन जम्मा सदस्यमध्ये ४७ सांसदको सहमती चाहिन्छ । यसबीच राईले भने आफुँपक्षमा बहमुत देखाउनुपर्ने हुन्छ ।
वि.सं.२०७७ माघ ५ सोमवार १३:१५ मा प्रकाशित
