हामी सबैकाे संसारन्यूज

माघ ११, काठमाडौं । प्रचण्ड–नेपाल पक्षीय नेकपाको स्थायी समिति बैठक पार्टी कार्यालय पेरिसडाँडामा सुरु भएको छ । बैठक केहि बेर अघिदेखि सुरु भएको स्थायी समिति सदस्य गणेश शाहले जानकारी दिए ।

आजको बैठकमा प्रतिनिधि सभा विघटनविरुद्व घोषित आन्दोलनका कार्यक्रमबारे समिक्षा गर्ने कार्यक्रम तय भएको उनले जनाएका छन् । उनका अनुसार आजको बैठकमा प्रधानमन्त्री केपी शर्मा ओलीसँग सोधिएको स्पष्टीकरणबारे पनि छलफल हुनेछ ।

गत माघ २ मा बसेको प्रचण्ड–नेपाल पक्षको स्थायी समिति बैठकले ओलीलाई स्पष्टीकरण सोध्ने निर्णय गरेको थियो । जुन निर्णयअनुसार गत माघ ५ मा प्रचण्ड–नेपाल पक्षले ओलीलाई स्पष्टीकरण पत्र बुझाएको थियो ।

तीन दिनको अवधि राखेर सोधिएको स्पष्टीकरण पत्रबारे ओलीले जवाफ दिएका छैनन् ।

यसअघि शनिबार काठमाडौं उपलब्ध स्थायी समिति सदस्यहरुको बैठक पेरिसडाँडामा बसेको थियो । जुन बैठकको निर्णयअनुसार नै पुनः आज स्थायी समिति बैठक बसेको हो ।