Sansar News
११ माघ, काठमाडौँ । नेपाल कम्युनिष्ट पार्टी (नेकपा) दाहाल – नेपाल समहूले केपी शर्मा ओलीलाई कारबाही गरेको छ ।
पार्टी कार्यालय कोटेश्वर पेरिसडाँडामा आइतबार बसेको स्थायी कमिटी बैठकले ओलीलाई कारबाही स्वरुप पार्टी सदस्यसमेत नरहने गरी हटाउने निर्णय गरेको हो ।
ओलीले पार्टीको नीतिविपरीत गतिविधि बढाउँदै गएको भन्दै माघ २ मा बसेको स्थायी कमिटी बैठकले उनलाई पार्टी सदस्यताबाट किन नहटाउने भनेर स्पष्टीकरण सोध्ने निर्णय गरेको थियो ।
माघ ५ मा उक्त पत्र प्रधानमन्त्रीको सरकारी निवास बालुवाटार पुगेर नेताहरुले बुझाएका थिए । ओलीलाई तीन दिनभित्र स्पष्टिकरण पत्र बुझाउन समय दिइएको थियो । तर, ओलीले स्पष्टीकरण नबुझाएपछि उनलाई बैठकले पार्टी सदस्यताबाट निष्कासन गर्ने निर्णय गरेको हो ।
त्यस्तै बैठकले प्रधानमन्त्री ओलीको संसद् विघटन विरुद्धको संघर्षका कार्यक्रमको समिक्षा गरेको छ । बैठकले यसअघि संचालित संघर्षका कार्यक्रम र माघ ९ गतेको विरोध प्रदर्शन सफल भएको निष्कर्ष निकाल्दै सोमबार नै फेरि दोस्रो चरणको संघर्षका कार्यक्रम सार्वजनिक गर्ने निर्णय पनि गरेको छ ।
प्रवक्ता नारायणकाजी श्रेष्ठका अनुसार बैठकले पार्टीको केन्द्रीय कार्यालय सचिवमा गंगालाल तुलाधर र उपसचिवमा मोहन गौतमलाई थप्ने निर्णय गरेको छ ।
सो बैठकले पार्टीको प्रदेश, जिल्ला, जनवर्गीय संगठनलगायतमा रिक्त पदमा पदाधिकारीहरुको चयन र अन्य सांगठनिक एकीकरणका काम टुंगाउने जिम्मा सचिवालय दिने निर्णय गरेको पनि श्रेष्ठले बताए ।
वि.सं.२०७७ माघ ११ आइतवार २०:१४ मा प्रकाशित
