हामी सबैकाे संसारन्यूज

२३ माघ, काठमाडौं । नेपाल कम्युनिष्ट पार्टी (नेकपा) का प्रचण्ड माधव समूहका अध्यक्ष पुष्पकमल दाहाल प्रचण्डले आफू आन्दोलनका क्रममा भएका त्रुटिहरुको आत्मसमिक्षा गर्ने तर आन्दोलनबाट कुनै पनि हालतमा पछि नहट्ने बताएका छन् ।

शुक्रबार पत्रकारहरुसँग कुरा गर्दै अध्यक्ष प्रचण्डले आन्दोलनबाट कोही पनि नेताहरु पलायनको पक्षमा नभएको बताउँदै फेरि पनि संघर्ष अगाडि बढाउँदै जाने बताए ।

‘हामी फेरि पनि संघर्ष गर्ने, राष्ट्र र जनताको पक्षमा लोकतन्त्र र संविधानको पक्षमा लडाइको मैदानमा छौं,’ अध्यक्ष प्रचण्डले भने, ‘युद्धलाई शान्तिमा रुपान्तरण, शान्तिलाई संविधानसभामा रुपान्तरण, संविधानसभालाई संघीय लोकतान्त्रिक गणतन्त्रमा रुपान्तरण अनि बलियो सरकार निर्माणमा पहलकदमी यी सबै हाम्रो पार्टी र नेताहरुको योगदान हो त्यसलाई मिनिमाइज गरेर हेरिया भने त्यो न्याय हुँदैन ।’

अध्यक्ष प्रचण्डले अहिले भइरहेको घटनाक्रम नेकपाको आन्तरिक विषय मात्र नभएको बताउँदै यो कदमलाई असंबैधानिक र प्रतिगमनकारी कदम भन्दै बुद्धिजीवी, पत्रकार, नागरिक, कानुन व्यवसायीहरुलगायतका व्यक्तिवहरु देश निकै अप्ठरोमा जाँदैछ भनेर विभिन्न प्रकारबाट आन्दोलनका कार्यक्रम गरिरहेको समेत बताए ।

अध्यक्ष प्रचण्डले २०६२/६३ कोृ आन्दोलनसम्म् आउँदा अब सायद यस्तो प्रकृतिको आन्दोलन देशमा गर्नुपर्दैन भनेर सोचेको बेला अहिले फेरि लोकतन्त्रको लागि सडक आन्दोलनमा जानु परेको बताए । ‘हामी जनताको साथ लिएर हातेमालो गर्दै जान चाहान्छौं ।’ उनले भने ।

विहिबारको आन्दोलनमा कायकर्ताद्धारा लगाइएको एमसीसी विरुद्धको नाराका विषयमा कुरा गर्दै उनले आफू त्यसको समर्थनमा नगएको बरु आन्दोलनमा तय गरिएका नारा भन्दा बाहिरका नारा नलगाउन आफूले आग्रह गरेको पनि अध्यक्ष प्रचण्डले बताएका छन् ।

‘अहिले हामी संबैधानिक परिषद्मा भएको ज्यादति पुर्ननियुक्ति यो सामान्य खालको छैन, नसुनुवाइ छ, सुनुवाइ समिति छैन । सभामुखले प्रक्रिया नपुगेको भनेर फिर्ता पठाएको स्थिति छ । यो बेलामा दशथरीका नारा लगाउनु भन्दा आन्दोलनको जे नारा छ त्यहि केन्द्रीत गरौं भन्ने हो ।’ अध्यक्ष प्रचण्डले भने ।