हामी सबैकाे संसारन्यूज

माघ २३, काठमाडौं । प्रधानमन्त्री केपी शर्मा ओलीले नेपाल कम्युनिष्ट पार्टी (नेकपा)को मुल पार्टी कुन हो भन्ने टुंगो लागेको बताएका छन् । शुक्रबार नारायणहिटी संग्रहालयमा भएको आफुँ पक्षीय जनसभालाई देखाउँदै उनले मुल पार्टीको टुंगो लाग्यो बताए ।

जनसभालाई सम्बोधन गर्दै ओलीले भने, ‘अब पनि कोही अलमल छ त कुन पार्टी मूल पार्टी हो भनेर ? हामी हौं मूल पार्टी । हामी कम्युनिष्टको मात्रै होइन, देशकै मूल पार्टी हौं ।’

उनले मुल पार्टीको विषयमा भएको विवादप्रति आपत्ति जनाए ।

‘अरुले सभा जहाँ राखेपनि ठूलो हुन्छ, हामीले जहाँ रोजेपनि हामीलाई कम हुन्छ,’ उपस्थित तर्फ हेर्दै उनले भने, ‘फेरि, मान्छेहरु सोधिराख्या छन्, मूल पार्टी कुन हो भनेर, कोही अलमलमा छ अझै पनि भने कठैबरा भन्न सकिन्छ, मूल पार्टी कुन हो थाहा पाउनु परेन ? मूल पार्टी यही हो, जहाँ तपाईं हामी छौं ।’

उनले आफ्नो पार्टी कम्युनिष्ट पार्टीहरुको मुल पार्टी मात्रै नभएर देशकै मुल पार्टी भएको बताए ।