हामी सबैकाे संसारन्यूज

२९ माघ, काठमाडौं । नेपाली कांग्रेसले नेपाल कम्युनिष्ट पार्टी (नेकपा) प्रचण्ड-माधव समूहकी नेतृ रामकुमारी झाँक्रिलाई अविलम्ब रिहागर्न माग गरेको छ ।

राष्ट्रपतिविरुद्द अभिव्यक्ति दिएको आरोपमा राज्युविरुद्धको कसुरमा पक्राउ परेकी नेतृ झाँक्रिको रिहाइको माग गर्दै संयमित अभिव्यक्ति दिन समेत सम्बन्धीत सबैमा कांग्रेसले आग्रह गरेको छ ।

पछिल्लो समय नेपाली राजनीतिमा बढ्दै गएको उत्तेजक अभिव्यक्ति र व्यवहारको शृंखलाप्रति चिन्ता व्यक्त गर्दै नेकपाका दुई समूहको नेतृत्व पंक्तिबाट व्यक्त हुँदै आएको कतिपय अभिव्यक्ति सभ्य र सुसंस्कृत समाज अनुकुल नभएको समेत कांग्रेसले ठहर गरेको छ ।

‘अहंकारयुक्त, अमर्यादित र अशोभनिय अभिव्यक्तिहरु जो जसबाट प्रकट भएका हुन् सबै आलोच्य छन् । यस्ता अभिव्यक्तिले त्यस्ता दल र व्यक्तिप्रति समाजमा नकारात्मक प्रभाव त पार्छ नै सिंगो राजनीतिप्रति वितृष्णा जन्माउन योगदान गर्दछ,’ कांग्रेसका प्रवक्ता विश्वप्रकाश शर्माद्धारा विहिबार जारी विज्ञप्तिमा भनिएको छ, ‘नेपाली कांग्रेस संयमपूर्वक यसको समाधान पहिल्याउन अपिल गर्दै नेकपाकी नेतृ रामकुमारी झाँक्रिलाई अविलम्ब रिहा गर्न माग गर्दछ ।’