हामी सबैकाे संसारन्यूज

३० माघ, काठमाडौं । भारतबाट नेपाल छिरेर बालुवा तस्कर गर्दै आएका तस्करी र प्रहरीवीच झडप हुँदा सशस्त्रका तीन प्रहरी घाईते भएका छन् ।

शुक्रबार बिहान पर्साको जीरा भवानी गाउँपालिका १ को ओरिया खोलाबाट बालुवा निकालेर लैजादै गरेको अवस्थामा प्रहरीले उनीहरुलाई नियन्त्रणमा लिने क्रममा भएको झडपमा शसस्त्र प्रहरी जवान आयुष राय यादव र महेश प्रसाद यादव गम्भीर भएका छन् । साथै अर्का प्रहरी जवान सुमन वस्तिको सेढवास्थित स्वास्थ्य चौकीमा उपचार भइरहेको पर्साका सशस्त्र प्रहरी उपरीक्षक राजेन्द्र खड्काले जनाएका छन् ।

वस्ति सामान्य घाईते भएका थिए भने गम्भीर रहेका यादवद्धयको वीरगन्जस्थित नारायणी अस्पतालमा उपचार भइरहेको पनि उपरीक्षक खड्काले जानकारी दिएका छन् ।

बालुवा तस्करी गरिरहेको सूचना पाएपछि प्रहरी बोर्डर आउट पोष्ट पिडारीगुठी र महादेवपट्टीबाट सशस्त्र प्रहरीको टोली विहानै त्यतातर्फ गएको थियो । त्यहि तस्कर र प्रहरीबीच झडप भएको थियो । प्रहरीले बालुवा लोड गरिएका ३ वटा भारतीय ट्याक्टरलाई नियन्त्रणमा लिने क्रममा भारतको भंगाहा, इनर्वा र विसनपूर्वा गाउँबाट बेल्चा लठ्ठी र भाला बोकेर आएका भारतीय तस्करले आक्रमण गरेका थिए ।