Sansar News
फागुन ३, काठमाडौं । प्रदेश १ का मुख्यमन्त्री शेरधन राईविरुद्व अविश्वासको प्रस्ताव मात्रै दर्ता भएको छैन् उनी अल्पमतमा पुगेको पनि स्पष्ट भएको छ । सोमबार राई सरकारले मनाएको तेस्रो वार्षिकोत्सव कार्यक्रमलाई प्रचण्ड–नेपाल समूहसहित प्रतिपक्षी कांग्रेसले पनि बहिस्कार गरेसँगै यस्तो देखिएको हो ।
कांग्रेसले हालसम्म कुन पक्षलाई समर्थन गर्ने भन्ने निष्कर्ष निकालेको छैन् । तर, राई सरकारको वार्षिकोत्सवलाई बहिस्कार गरेसँगै कांग्रेस पनि उनको विपक्षमा रहेको स्पष्ट देखिएको छ ।
प्रदेश १ का कांग्रेस प्रमुख सचेतक केदार कार्कीका अनुसार संसद छल्दै हिँड्ने सरकारलाई समर्थन गर्नु आवश्यक नठानेर कांग्रेसले बहिस्कार गरेको हो । उनका अनुसार वार्षिकोत्सव कार्यक्रम सरकारको नभई राई समूहको हो ।
अविश्वास प्रस्तावमाथि निरन्तर अवरोध पुर्याउँदै
मुख्यमन्त्री राईविरुद्व प्रचण्ड–नेपाल समूहले गत पुस १२ मा अविश्वासको प्रस्ताव दर्ता गराएको थियो । नेकपा विभाजन भएसँगै प्रचण्ड–नेपाल समूहका ३७ सांसदले उनीविरुद्व अविश्वासको प्रस्ताव दर्ता गराएका थिए ।
तर, उक्त प्रस्तावलाई मुख्यमन्त्री राईले निरन्तर अगाडि बढ्न अवरोध पुर्याउँदै आएका छन् । अविश्वासको प्रस्ताव दर्ता भएको दुई महिना पुग्नै लाग्दा पनि प्रस्तावमाथि छलफल हुने स्थितिसमेत बनेको छैन् ।
राईको दबाबमा उनीसमर्थित सभामुखले निरन्तर प्रदेश सभाको बैठक स्थगित गर्दै आएका छन् । बैठक आगामी फागुन ९ गतेका लागि बोलाइएको छ । तर, राई पक्षले भने अविश्वासको प्रस्ताव टेवल गर्ने र छलफल अगाडि बढाउने गतिविधि अगाडि बढाइएको अवरोध गर्ने चेतावनी दिएको छ ।
९३ सदस्यीय प्रदेशसभामा राईको पक्षमा ३० जनामात्रै सांसद छन् । तर, बहुमत पुर्याउन राईलाई ४७ सांसदको आवश्यक पर्दछ ।
वि.सं.२०७७ फागुन ३ सोमवार १२:०२ मा प्रकाशित
