हामी सबैकाे संसारन्यूज

५ फागुन, काठमाडौं । सरकारले केही साता अघि विशिष्ट तथा अति विशिष्ट व्यक्तिको सुरक्षामा खटिएका सुरक्षाकर्मी कटौती गरेपछि झण्डै डेढ दर्जन पूर्वमन्त्रीले पुनर्विचार गरिदिन भन्दै निवदेन दिएका छन् ।

आफू पटक-पटक सुरक्षा थ्रेटमा रहेको र सुरक्षाकर्मी कटौतीका कारण झन सुरक्षा थ्रेट महसुस गरेको भन्दै निवेदन दिएका हुन् ।

नेपाली कांग्रेसका नेता तथा पूर्वमन्त्री रामशरण महतले केही दिनअघि आफू पटक–पटक सुरक्षा थे्रटमा रहेको र सुरक्षाकर्मी कटौतीका कारण झन सुरक्षा थ्रेट महसुस गरेको बताएका छन् ।

उनले यसबारेमा गृहसचिव, गृहमन्त्री र आवस्यक परे प्रधानमन्त्रीसँग समेत कुरा गर्ने बताएको बुधबारको कान्तिपुर दैनिकमा समाचार छ ।

त्यस्तै सुरक्षाकर्मी फर्काइएपछि पुर्वगृहमन्त्री गोविन्दराज जोशी, पूर्व गृहराज्यमन्त्री देवेन्द्रराज कँडेल, पुर्वअर्थराज्यमन्त्री ल्हारक्याल लामा लगायतले पनि असन्तुष्टी जनाएका छन् । स्रोतका अनुसार डेढ दर्जन पूर्वमन्त्री तथा राजनीतिकर्मीले सुरक्षाकर्मी फिर्ता भएपछि आफूहरुलाई असुरक्षा रहेको कारण देखाउँदै अंगरक्षकको व्यवस्था गरिदिन गृहमन्त्रालयमा निवेदन दिएका छन् ।

निवेदन दिनेमा राप्रपा अध्यक्ष एवं पूर्वमन्त्री प्रकाशचन्द्र लोहनी, कांग्रेस नेता एवं पूर्वमन्त्री अर्जुननरसिंह केसी, पुर्वगृह राज्यमन्त्री कंडेल र रिजवान अन्सारी, पूर्वअर्थराज्यमन्त्री लामालगायत नेताले अंगरक्षकका व्यवथाा गरिदिन गृहमा निवेदन दिएका छन् ।