हामी सबैकाे संसारन्यूज

५ फागुन, लम्जुङ । नेकपा जिल्ला कमिटी लम्जुङको विभिन्न तहमा रहेर क्रियाशिल १९ जनाले प्रतिगामी कदमका विरुद्धमा शसक्त रुपमा लाग्ने बताएका छन् ।

प्रधानमन्त्री केपी शर्मा ओलिले संविधानले दिँदै नदिएको अधिकार प्रयोग गरी आफूलाई संविधानभन्दा माथि राखेर तानाशाह बन्ने कोशिस गरेको उनीहरुको आरोप छ ।

पत्रकार सम्मेलन गर्दै उनीहरुले यस प्रकारको प्रतिगमनकारी हर्कतको भण्डाफोर गर्दै प्रतिगमन विरुरुद्धको संघर्षमा मूलप्रवाहको रुपमा रहेको नेपाल कम्युनिष्ट पार्टी(नेकपा)द्वारा संचालित संघर्षका कार्यक्रममा विचलित नभइ प्रतिगामी कदमको विरुद्ध हुने आन्दोलनका पक्षमा उभिने ऐक्यबद्धता व्यक्त गरेका हुन् ।

जनाधिकारको रक्षाका निम्ति संचालित संघर्षका कार्यक्रमहरुलाई अझ शसक्त बनाउन पनि उनीहरुले लम्जुङवासी लगायत सम्पूर्ण न्यायप्रेमी जनसमुदायलाई हार्दिक अपिल गरेका छन् ।

प्रतिगमन विरुद्ध एकताबद्ध जाहेर गर्नेहरुमा नेकपा जिल्ला कमिटी सदस्य तथा तत्कालिन नेकपा(एमाले) जिल्ला कमिटी सचिवालय सदस्य राइनास न.पा. १ का ऋषिकेश घिमिरे, तत्कालिन नेकपा(एमाले) जिल्ला सल्लाहकार परिषद् लम्जुङ अध्यक्ष लगायत रहेका छन् ।