Sansar News
५ फागुन, काठमाडौँ । प्रतिगमन विरुद्धको आन्दोलनमा ऐक्यबद्धता जनाइरहेका बुद्धिजीवी तथा पेशाकर्मीहरुले बिहिवारको आन्दोलनमा सक्रिय सहभागिता जनाउने भएका छन् ।
नेपाल कम्युनिस्ट पार्टी (नेकपा) निकट नेपाल बुद्धिजीवी संगठनका सहसंयोजक तथा संघर्ष समितिका संयोजक कृष्ण केसीका अनुसार बिहिवारको मानवसाङ्लो कार्यक्रममा बुद्धिजीवी तथा पेशाकर्मीहरु महांकालदेखि विर अस्पताल हुँदै भोटाहिटीसम्म उभिने छन् ।
प्रतिगमनका विरुद्ध सक्रिय रहेको सो संगठनका केन्द्रीय संयोजक डा. दिनेशचन्द्र देवकोटाले आम बुद्धिजीवी तथा पेशाकर्मीहरुको व्यापक उपस्थिति र नियमित क्रियाशिलताले प्रतिगमन परास्त हुने विश्वास व्यक्त गरेका छन् ।
नेपाल बुद्धिजीवी संगठनले प्रतिगमनको विरोधका क्रममा संगठनको तर्फबाट प्रेस विज्ञप्ति जारी, पुस १४ को विरोध प्रदर्शनमा सक्रिय सहभागिता, प्रतिगमनका विरुद्ध बृहत राजनीतिक तथा संवैधानिक अन्तरक्रिया, पेशाकर्मी बुद्धिजीवीहरुसँगको सहकार्यमा संयुक्त अपिल प्रकाशन तथा विभिन्न जनप्रदर्शनमा सक्रिय सहभागिता जनाइरहेको छ । केसीले फागुन ६ गते बिहिवार ठिक ३.४५ भित्र महांकाल मन्दिर अगाडि बुद्धिजीवी तथा पेशाकर्मीलाई उपस्थित हुन अनुरोध गरेका छन् ।
वि.सं.२०७७ फागुन ५ बुधवार २०:५६ मा प्रकाशित
