हामी सबैकाे संसारन्यूज

६ फागुन, काठमाडौं । नेपाल कम्युनिष्ट पार्टी (नेकपा) को प्रचण्ड-माधव समूहले आज मानव साङ्लो बनाएर टुडिखेल घेर्ने भएको छ ।

प्रधानमन्त्री केपी शर्मा ओलीको सिफारिसमा पुष ५ गते प्रतिनिधिसभा विघटन भएसँगै त्यसलाई अलोकतान्त्रिक र असंबैधानिक कदम मान्दै त्यसको विरोधमा विभिन्न चरणमा आन्दोलन गर्दै आएको छ ।

सो समूद्धारा फागुन २ गते घोषणा गरिएको चौथो चरणको आन्दोलनका कार्यक्रम अन्तर्गत आज दिउँसो प्रतिगमन, महंगी र भ्रष्टाचारको विरोधमा टुडिखेल वरिपरी दिउँसो ४ देखि ५ बजेसम्म (१ घण्टा) मानव साङलो बनाएर विरोध प्रदर्शन गर्ने कार्यक्रम रहेको छ ।

उक्त मानब साङ्लोका लागि भोटाहिटीदेखि रत्नपार्कको आकासे पुलसम्म मजदूर नेता तथा कार्यकर्ता, रत्नपार्कको आकासेपुलदेखि भद्रकालीसम्म काठमाडौं, ललितपुर र भक्तपुर जिल्ला कमिटीका नेता तथा कार्यकर्ता तथा विद्यार्थी संगठनका नेताहरुका लागि भद्रकालीदेखि सुन्धारासम्म स्थान तोकिएको छ ।

यस्ता छन् आगामी कार्यक्रमहरु

फागुन ७ गते देशव्यापी रुपमा सबै पालिकाका वडास्तरमा विरोध कार्यक्रम गरिने ।

फागुन ७ देखि १५ गतेसम्म संविधान र लोकतन्त्रको पक्षमा सार्वजनिक स्थलहरुमा हस्ताक्षर कार्यक्रम गर्ने । प्रत्येक वडामा सो पक्षका कमिटीहरुले हस्ताक्षर संकलन गर्ने । जनवर्गीय, पेशागत र वुद्दिजीवी संगठनहरुले पनि हस्ताक्षर अभियानमा सहिभागी हुनेछन् ।

फागुन ८ गते काठमाडौंमा पेशागत र वुद्दिजीवी संगठनहरुको आयोजनामा प्रतिगमन विरुद्ध वृहत् अन्तरक्रिया कार्यक्रम गर्ने । यो अन्तरक्रियामा आन्दोलनमा रहेका सबै राजनीतिक दल र बिभिन्न बौद्धिक समुदायको उपस्थिति रहनेछ ।

फागुन ९ गते प्रतिगमन र महिला हिंसा, हत्या एवं बलात्कारका विरुद्ध उपत्यका र जिल्लास्तरीय रुपमा देशव्यापी रुपमा महिलाहरुको विरोध कार्यक्रम आयोजनागर्ने ।

फागुन १० गते काठमाडौं र अन्य जिल्लामा दलित मोर्चाहरुद्धारा विरोधका कार्यक्रम आयोजना गर्ने ।

फागुन ११ गते मधेशी आदिवासी, जनजाति महिला, मुस्लिम थारु, लगायतका उत्पीडित समुदायको सास्कृतिक पहिचान सहितको विरोध कार्यक्रमको आयोजना गर्ने ।

फागुन १२ गते चितवन र फागुन २१ गते दाङमा ठूलो जनप्रदर्शन गर्ने बताइएको छ । साथै जनकपुर र नेपालगन्जमा ठूलो विरोध प्रदर्शन गरिने र त्यसको मिति पछि तोकिने बताइएको छ ।

फागुन १४ गते काठमाडौंमा बृहत् युवा र्यालीको आयोजना गर्ने ।

फागुन १५ गते किसान, सुकुम्वासी मोर्चाको आयोजनामा काठमाडौंमा विरोध प्रदर्शन गरिने भएको छ ।

सो पक्षले यसअघि पुष १४ गते, माघ ९ गते र माघ २८ गते विशालरुपमा विरोध प्रदर्शन सम्पन्न गरेको छ । त्यसैगरी काठमाडौं बाहिर प्रदेश नं १ को विराटनगरमा, लुम्निी प्रदेशको बुटवलमा, कर्णाली प्रदेशको सुर्खेतमा, सुदूरपश्चिमको धनगढी लगायतमा वृहत् प्रदर्शन सम्पन्न गरेको छ ।