हामी सबैकाे संसारन्यूज

८ फागुन, काठमाडौं । नेपाल कम्युनिष्ट पार्टी (नेकपा) ओली समूहकाे राष्ट्रिय युवा संघले प्रधानमन्त्री केपी ओलीको साइबर सेना बनेर खटिने निर्णय गरेको छ ।

माघ २५ र २६ मा बसेको बैठकले प्रधानमन्त्री ओलीको साइबर सेना बनेर खटिने निर्णय गरेको अध्यक्ष बचनबहादुर सिंहले पत्रकार सम्मेलनमार्फत जानकारी गराए ।

साइबर सेनाले सामाजिक सञ्जालमा सरकारविरुद्ध भइरहेको गलत प्रचारलाई नियन्त्रण गर्ने सिंहले बताए । सिंहका अनुसार सामाजिक सञ्जालको दुरुपयोग गर्दै व्यक्तिको चरित्र हत्या गर्ने काम भइरहेकाले त्यसलाई निरुत्साहित गर्न साइबर सेना निर्माण गरिएको हो ।

साइवर सेना विवेकपूर्ण ढंगले परिचालित हुने बताउँदै सिंहले पत्रकार सम्मेलनमा आगामी चैतभित्रै ओलीको पक्षका पाँच लाख बर्दी बिनाको सेना निर्माण गरिने उद्घोष गरे  ।

उनले ५ लाख युवालाई संघको सदस्य बनाएर केपी ओलीले बोकेको समृद्ध नेपाल सुखी नेपाली अभियानको बर्दी बिनाको सिपाही बनाउने बताए  ।