हामी सबैकाे संसारन्यूज

११ फागुन, काठमाडौँ । जनसांस्कृतिक महासङ्घ नेपालले भोलि बुधबार प्रधानमन्त्री केपी शर्मा ओलि प्रमुख अतिथि रहि आयोजना हुन लागेको कार्यक्रम बहिष्कार गर्न निर्देशन दिएको छ ।

प्रधानमन्त्री खड्ग प्रसाद ओलीलाई प्रमुख अतिथि बनाई २०७७ फागुन १२ गते आयोजना गरेको ‘सहिद चुनु स्मृति प्रतिष्ठान समुद्घाटन तथा सहिद बेपत्ता परिवार अभिनन्दन वृहत् सांस्कृतिक कार्यक्रम २०७७’ बहिष्कार गर्न निर्देशन दिएको हो ।

महासंघका संयोजक सरल सहयात्रीद्वारा जारी प्रेस नोटमा प्रतिनिधिसभा विघटन गर्ने असंवैधानिक प्रधानमन्त्रीबाट चुनु स्मृति प्रतिष्ठानको उद्घाटन हुनु सहिद एवम् बेपत्ता र प्रगतिशील सांस्कृतिक आन्दोलनको ठाडो अपमान गरेको ठहर गरिएको छ ।

प्रेस नोटमा भनिएको छ – ‘कमरेड डम्बर कुमारी गुरुङले जन सांस्कृतिक महासङ्घ र स्वयम् चुनु स्मृति प्रतिष्ठानको समेत वैधानिक निर्णय नलिई एकल ढङ्गले प्रतिगमनका खलनायक असंवैधानिक प्रधानमन्त्री खड्ग प्रसाद ओलीलाई प्रमुख अतिथि बनाई यही २०७७ फागुन १२ गते आयोजना गरेको ‘सहिद चुनु स्मृति प्रतिष्ठान समुद्घाटन तथा सहिद बेपत्ता परिवार अभिनन्दन वृहत् सांस्कृतिक कार्यक्रम २०७७’ स्वयम् सहिद चुनु तथा अन्य सहिद एवम् बेपत्ता र प्रगतिशील सांस्कृतिक आन्दोलनको ठाडो अपमान हो । यसर्थ जनसांस्कृतिक महासङ्घ नेपाल सम्बद्ध कुनै पनि कमरेडहरूलाई सो कार्यक्रम बहिष्कार गर्नका लागि महासङ्घको तर्फबाट हार्दिक निर्देश गरिएको छ ।’

प्रेस नोटमा प्रगतिशिल सोच भएका सम्पूर्ण कलाकार, सांस्कृतिककर्मीहरुलाई यस्ता खाले अवसरवादी प्रवृत्तिको डटेर निरन्तर प्रतिवाद गर्न समेत अनुरोध गरिएको छ ।