Sansar News
फागुन ११, काठमाडौं । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले सर्वोच्च अदालतले संसद विघटनकै पक्षमा फैसला सुनाउने विश्वास व्यक्त गरेका छन् । मंगलबार राजधानीमा आयोजित ‘जनयुद्धको हस्ताक्षर’ नामक पुस्तकको विमोचन गर्दे उनले यस्तो विश्वास व्यक्त गरेका हाुन् ।
‘अदालतप्रति विश्वास छैन भनेर मैले भन्न खोजेको छैन’, उनले भनेका छन्, ‘मैले विभिन्न सार्वजनिक सभाहरुमा पनि भन्दै आएको छु कि–अदालतमा मुद्दा छ, अदालतले सही फैसला गर्छ भन्ने हामीलाई विश्वास छ।’
प्रधानमन्त्री केपी शर्मा ओलीले मुद्दा हारिसकेको प्रचण्डको भनाई छ ।
प्रधानमन्त्री ओलीले निकै मेहनत गरेर बनाएको पार्टीलाई फुट, विघटन र विर्सजनको बाटोमा लगेको उनले बताए । उनले आफुँहरु नै एकताको पक्षपाती रहेको दाबी गरे ।
‘पार्टी निकै दुःख, मेहनतले एकताबद्ध गरिएको हो, हामी सबैको समर्थन र योगदान त्यसमा छ, त्यसलाई विभाजन गर्ने निकै ठूला षडयन्त्र र कसरत अहिले भई नै रहेको छ’, प्रचण्डले भने, ‘हामी जो छौं, एकताको झण्डा हामीले उठाएका हौं, केपी जीले फुट, विघटन र विर्सजनको बाटो रोज्नुभयो ।’
प्रचण्डले पुस ५ (प्रतिनिधि सभा विघटनको दिन) देखि नै आफुँहरु युद्धमा रहेको र युद्ध जित्नुको विकल्प नरहेको पनि बताए । उनका अनुसार प्रधानमन्त्री ओलीले सरकारको दुरुपयोग गर्दै युद्ध जित्न भएभरको शक्ति खर्चिएका छन् ।
वि.सं.२०७७ फागुन ११ मंगलवार १४:२० मा प्रकाशित
