हामी सबैकाे संसारन्यूज

१२ फागुन, काठमाडौं । पशुपतिनाथ मन्दिरमा आज बिहान मात्रै जलहरी राखिएको छ, तर दिउँसो सर्वोच्च अदालतले नराख्न सरकारका नाममा अन्तरकालिन अन्तरिम आदेश जारी गरेको छ ।

प्रदेशसभा सांसद नरोत्तम वैद्य र अधिवक्ता नितीका ढुंगानाले दायर गरेको छुट्टाछुट्टै रिटमाथि सुनुवाई गर्दै न्यायाधीश पुरुषोत्तम भण्डारीको एकल इजलासले तत्काल पशुपतिनाथ मन्दिरमा जलहरी लगाउने कार्य नगर्नु भनी अन्तरकालीन अन्तरिम आदेश जारी गरेको हो ।

यस विषयमा अन्तरिम आदेश दिने या नदिने विषयमा छलफल गर्न दुवै रिट निवेदक र सरकार पक्षलाई फागुन १७ गते छलफलमा बोलाइएको छ भने जलहरी राख्नुको लिखित कारण पनि सर्वोच्चले सरकारसँग माग गरेको छ ।

राष्ट्रपति विद्यादेवी भण्डारीको उपस्थितिमा बिहानै पूजा आरधाना गरी पशुपतिनाथको मूल शिवलिंगको जलहरीलाई सुनले ढाकिएको छ ।

पशुपति क्षेत्र विकास कोषका सदस्य सचिव डा प्रदीप ढकालले जानकारी दिए अनुसार पशुपतिनाथमा रहेको चाँदीको जलहरी जीर्ण भएकोले त्यही चाँदीको जलहरीलाई १०८ किलोको सुनको आवरणले ढाकिएको हो।  जलहरी बनाउन मात्र ८० करोड रुपैँया खर्च भएको सदस्य सचिव डा ढकालले जानकारी दिए ।