हामी सबैकाे संसारन्यूज

फागुन २०, काठमाडौं । बिहिबार बिहानदेखि नै नेकपाको प्रचण्ड–नेपाल समूहको केन्द्रीय कार्यालय पेरिसडाँडामा निकै चहलपहल थियो । काठमाडौंमा उपलब्ध सबै केन्द्रीय सदस्य पार्टी कार्यालय वरपर जम्मा भएका थिए ।

प्रचण्ड–नेपाल समूहका एक नेताका अनुसार निर्वाचन आयोग जानको लागि सबै नेताहरुलाई नागरिकतासहित कार्यालयमा बोलाइएको थियो । सबै केन्द्रीय सदस्यलाई निर्वाचन आयोगमा नागरिकतासहित उपस्थित गराउने योजना पार्टी अध्यक्षद्धय पुष्पकमल दाहाल प्रचण्ड र माधवकुमार नेपालको थियो ।

तर, दिउँसो २ बजे आयोग जाने योजनामा जम्मा भएका केन्द्रीय सदस्य १ बज्दा नबज्दै कार्यालय परिसरबाट निस्कन थाले । बुझ्दा आयोग जाने निर्णय अन्तिम समय स्थगित भएसँगै उनीहरु कार्यालयबाट निस्किएका थिए ।

किन स्थगित भयो आयोग जाने निर्णय ?

प्रचण्ड–नेपाल समूहका एक केन्द्रीय सदस्यका अनुसार आयोगले नेकपाको आधिकारिताको विवादबारे छिट्टै निर्णय गर्ने जानकारी दिएपछि आयोग जाने कार्यक्रम स्थिगित गरिएको हो ।

‘आयोगबाट जानकारी आएको छ, हामी छिट्टै निर्णय गर्दैछौं भन्ने, सायद आजै पनि निर्णय हुनसक्छ’, ती नेताले भने, ‘आयोग स्वंयले छिट्टै निर्णय गर्छु भनेपछि हामीले आफ्नो कार्यक्रम स्थगित गरेका हौं ।’

उनका अनुसार आयोगले प्रचण्ड–नेपाल पक्षलाई नै आधिकारिता दिने गरि निर्णय गर्दैछ । ‘पार्टी विभाजनमा बहुमत पक्षलाई नै आधिकारिक मान्ने व्यवस्था कानूनमै छ, उहाँहरुले पनि हामीले कानूनअनुसार साबिक बहमुत पक्षलाई आधिकारिकता दिन्छौं भन्नुभएको छ, यस अर्थमा हामीले नै आधिकारिकता पाउने कुरामा समस्या छैन्’, उनले भने ।

प्रचण्ड–नेपाल पक्षले गत बुधबार नै पार्टीका सबै केन्द्रीय सदस्यलाई नागरिकता र परिचयपत्रसहित काठमाडौं आउन निर्देशन गरेको थियो । जसअनुसार काठमाडौं आएका केन्द्रीय सदस्यहरुलाई शशरिर निर्वाचन आयोग उपस्थित गराउने योजना बनाएको थियो ।