हामी सबैकाे संसारन्यूज

फागुन २४, काठमाडौं । प्रचण्ड–नेपाल पक्षीय नेकपाको स्थायी समिति बैठक पार्टी केन्द्रीय कार्यालय पेरिसडाँडामा जारी छ । बैठकमा स्थायी समिति सदस्यहरुले धारणा राखिरहेका छन् ।

स्थायी समिति सदस्य रघुजी पन्तले पार्टी एकतालाई जोगाएरै जानुपर्ने धारणा राखेका छन् । सञ्चारकर्मीसँगको कुराकानीमा उनले पार्टी एकताका लागि फेरि पुष्पकमल दाहाल ‘प्रचण्ड’ र केपी शर्मा ओलीबीच छलफल हुनुपर्ने बताए । उनका अनुसार पार्टी एकताको सम्भावना छ भने त्यसका लागि दुवैले प्रर्यत्न गर्नुपर्छ ।

‘अदालतको फैसलाले नयाँ परिस्थिति विकास भएको छ, त्यसको लागि कमरेड अध्यक्ष प्रचण्ड र केपी ओलीले फेरि पनि कुराकानी गरेर यो एकतालाई अगाडि बढाउने सम्भावनाहरु छ भने त्यो सम्भावना पनि खोज्नुपर्छ भन्ने कुरा मैंले राखें’, सञ्चारकर्मीसँगको कुराकानीमा उनले भने ।

उनले फैसला केहि राजनीतिक खालको भएको पनि टिप्पणी गरे । अदालतको फैसलालाई सम्मान गर्नुको विकल्प नभएको उनको भनाई छ ।

‘सर्वोच्चको फैसला हो त्यसलाई सम्मान गर्नुपर्यो तर, अलिकति बढि राजनीतिक प्रकृतिको भयो’, उनले भनेका छन् ।

फैसलाका आधारमा आफुँहरु पूर्ववत अवस्थामा फर्किने वा नफर्किने भन्ने विषयमा छलफलमै रहेको उनले बताए । उनका अनुसार पार्टी एकता जोगाउन सम्भावना छ भने खोज्नुपर्छ ।

सोमबार सर्वोच्च अदालतले नेपाल कम्युनिष्ट पार्टी (नेकपा) नामको दल दर्ता कानूनसम्मत नभएको भन्दै बदरको फैसला गरेको थियो । साथै अदालतले नेपाल कम्युनिष्ट पार्टी (नेकपा) घोषणा पूर्वको नेकपा एमाले र माओवादी केन्द्र पनि ब्यूँतिएको फैसला गरेको थियो ।