Sansar News
२६ फागुन, काठमाडौं । अख्तियार दुरुपयोग अनुसन्धान आयोगले बयानकै क्रममा बैंक ठगी प्रकरणमा मुछिएकाहरुलाई पक्राउ गरेको छ ।
साविक रोयल मर्चेन्ट बैंकिङ्ग एण्ड फाइनान्स लिमिटेडका संचालक छविरमण अधिकारीसहित साविक रोयल मर्चेण्ट बैकिङ्ग एण्ड फाइनान्स लिमिटेडका संचालक बसन्त मल्ल, बरिष्ठ प्रबन्धक विकास श्रेष्ठ, प्रबन्ध संचालक मधुवनलाल श्रेष्ठ, इनोभेटिभ कन्सेप्ट नेपाल प्रा.लि. का संचालक मनोज कुमार भेटवाल, ऋणी भैरब प्रसाद भेटवाल र रविन लामासमेतलाई नियन्त्रणमा मंगलबार विशेष अदालत काठमाडौमा पेश गरिएको अख्तियारले जनाएको छ ।
बैंक ठगी प्रकरणमा मुछिएका काठमाडौं भ्यु टावर निर्माणको ठेक्का पाएको स्वच्छन्द बिकोइ विल्डर्स प्रा.लिका प्रमुख मनोज कुमार भेटवाललाई अख्तियारले बयानकै क्रममा पक्राउ गरेको छ ।
उनी बैंक ठगी काण्डका डिजाइनर मध्येका हुन् । भेटवाल इनोभेटिभ कन्सेप्ट नेपाल प्रालिका सञ्चालक समेत हुन् ।
अख्तियारले फरक–फरक ११ वटा मुद्दामा ४० करोड बढि घोटाला भएको ठहरसहित उनीहरुविरुद्ध विगो दावीसहित मुद्दा दायर गरेको हो ।
ती फरक फरक मुद्दामा २ करोड देखि ११ करोडसम्म घोटाला भएको अख्तियारको दावी छ ।
वि.सं.२०७७ फागुन २६ बुधवार ०९:०७ मा प्रकाशित
