हामी सबैकाे संसारन्यूज

फागुन २६, कैलाली । कैलालीको धनगढीमा नेकपा (एमाले)का दुई नेता भीम रावल र लेखराज भट्टका समर्थकबीच कुटाकुट भएको छ । प्रदेश पार्टी कार्यालयमा ‘नेम प्लेट’ राख्ने कुरामा विवाद हुँदा कुटाकुट भएको हो ।

प्रधानमन्त्री एवं पार्टी अध्यक्ष केपी शर्मा ओली पक्षले लेखराज भट्टलाई प्रदेश इन्चार्ज र नेता माधवकुमार नेपाल पक्षले भीम रावललाई प्रदेश इन्चार्ज मान्दै नेम प्लेट राख्न खोजे पछि विवाद भएको हो ।

बुधबार बिहानै माधव कुमार नेपाल पक्षधरले रावलको नाममा नेम प्लेट राखेको थियो । जसलाई ओली पक्षले हटाउँदै भट्टको नाममा नेम प्लेट राख्न खोजेपछि विवाद भएको थियो ।

नेम प्लेटको नाममा पार्टी कार्यालयमा कुटाकुट परेपछि प्रहरीले बलसमेत प्रयोग गरेको थियो ।

तत्कालिन नेकपाले सुदुर पश्चिम प्रदेशको इन्चार्जको जिम्मेवारी भीम रावललाई दिएको थियो । तर, पार्टी विभाजनसँगै ओली पक्षले रावललाई इन्चार्जबाट हटाउँदै भट्टलाई जिम्मेवारी दिएको थियो । तर, सर्वोच्चको फैसलासँगै साबिक अवस्थामै फर्किएको नेकपा एमालेभित्र जिम्मेवारी हेरफेरको विषयले विवाद जन्माएको हो ।