हामी सबैकाे संसारन्यूज

चैत २, काठमाडौं । नेकपा (एमाले)का दुई समूहबीच भएको छलफल सहमती उन्मुख नभएपछि माधवकुमार नेपाल पक्षले बोलाएको राष्ट्रिय भेला नरोक्ने भएको छ । बानेश्वरको एक होटेलमा आफुँ निकटका सांसद तथा केन्द्रीय सदस्यलाई बोलाएर नेता नेपालले यस्तो बताएका हुन् ।

फागुन २८ मा प्रधानमन्त्री ओली पक्षले बेग्लै बैठक बसालेर माधव नेपालसहित उनी पक्षीय नेताहरुलाई साबिक जिम्मेवारीबाट हटाएका थिए । साथै विधान संशोधन गर्दै केन्द्रीय समिति पनि बढाएका थिए ।

जुन निर्णयको विरोध उत्रिएको माधव नेपाल पक्षले समानान्तर कमिटीको घोषणा गर्दै चैत ४ र ५ गते राष्ट्रिय कार्यकर्ता भेला बोलाउने निर्णय गरेको थियो । प्रधानमन्त्रीसमेत रहेका पार्टी अध्यक्ष केपी शर्मा ओलीसँग भएको छलफल निष्कर्ष बिहिन बनेसँगै नेपाल पक्ष कार्यकर्ता भेला नरोक्ने निर्णयमा पुगेको हो ।

सोमबार पार्टी केन्द्रीय कार्यालय धुम्बाराहीमा झण्डै सबा दुई घण्टासम्म चलेको छलफल विना निष्कर्ष टुंगीएको थियो । माधव पक्षले फागुन २८ को निर्णय अमान्य बताएको थियो भने ओली पक्षले सोही निर्णयलाई टेकेर मात्र अगाडि जान सक्ने बताएको थियो ।

यसैबीच माधव नेपाल पक्ष ओलीले आयोजना गरेको चियापानमा सहभागी नहुने भएको छ । राष्ट्रिय कार्यकर्ता भेला नरोक्ने निर्णय गरेको माधव पक्षले बालुवाटारमा चैत ७ मा बोलाइएको चियापान कार्यक्रममा सहभागी नहुने निर्णय गरेको हो ।