हामी सबैकाे संसारन्यूज

जुवा थापे नारी प्रचलन भयो दाउ तनको
कहाँ जाउन् माता कुन स्थल छ यो बिश्व भरको
पुगिन् सीता लंका करुण पल ती व्यग्र छुटिँदा
भयो धेरै पीडा छटपट निकै देह लुटिँदा ।।१।।

तिमी चेली आयौ भुवनतलमा भार बहन
हुने जैले हिंसा मुलुक भरको घात सहन
जहाँ कृष्णा राधा सरस छ त्यहाँ पाप छ अति
भए राजा द्रोही कहर मनमा क्षोभ छ कति ।।२।।

मरे चेली हाम्रा दिनदिन भयो त्रास डर भो
सबै पापी मान्छे पतित खलको छैन भर जो
निरासाको जालो अँझ पनि अहो बढ्दछ पिया
कहाँ होला काया पतितजनको पोल्दछ हिया ।।३।।

कतै आशा छैनन् विरह मनमा दुख्दछ पल
झनै बढ्दो ऐले मनुज मनको दुष्ट छ छल
कठै छोरी जाती विचलित भए पीर वहमा
बलिन्धारा झर्ने नयन भरका अश्रु गहका ।।४।।

लुटे चेली आफ्नै पलपल यहाँ कष्ट विबश
बढे पापी जात्रै उपर तकमा दग्ध निरश
अहो हिंसा रोकौं अब त अति भो चीर हरण
गरे राम्रो आस्था अनुशरणमा शान्ति मरण ।।५।।

छन्द–शिखरिणी