८ चैत, काठमाडौं । नेपाल भेटेरिनरी एसोसिएसनको अध्यक्षमा पुनः डा.शितलकाजी श्रेष्ठ निर्वाचित भएका छन् ।
सानेपास्थित हेरिटेज गार्डेनमा चैत ६ गते सम्पन्न केन्द्रीय कार्यकारिणी समितिको निर्वाचनमा पशुसेवा विभागका निर्वतमान महानिर्देशक डा. वंशी शर्मालाई पछि पार्दै ३८६ मतसहित डा. श्रेष्ठ पुनः तेस्रो पटक अध्यक्षमा निर्वाचित भएका हुन् ।
त्यसैगरी उपाध्यक्षमा निवर्तमान महासचिव डा.गृष्म न्यौपानेलाई पछि पार्दै गर्दै डा. कृष्ण काफ्ले निर्वाचित छन् भने महासचिवमा डा. अशेष भट्टराई, सचिवमा डा. रामचन्द्र सापकोटा, प्रधान सम्पादकमा डा. सुरेन्द्र कार्की निर्विरोध निर्वाचित भएका छन् । साथै कोषाध्यक्षमा सिकेश मानन्धर निर्वाचित भएका छन् ।
कार्यकारिणी समितिको केन्द्रीय सदस्य पदमा १२ जना प्रतिस्पर्धीबाट ६ जना निर्वाचित हुने व्यवस्था रहे अनुसार डा.शंकर न्यौपाने, डा. सेरिन अमात्य, डा. अजित कुमार कर्ण, डा. महेश्वर दाहाल, डा. रकसन कर्माचार्य र डा.सविना लम्साल निर्वाचित भएका छन् ।
सातै प्रदेशमा एसोसिएसनको प्रादेशिक समितिहरूको निर्वाचन सम्पन्न भइसकेको छ भने प्रादेशिक समितिका अध्यक्षहरू केन्द्रीय कार्यसमितिको सदस्य रहने व्यवस्था छ ।
वि.सं.२०७७ चैत ८ आइतवार १२:४९ मा प्रकाशित