हामी सबैकाे संसारन्यूज

८ चैत, काठमाडौं । कोरोना संक्रमणको विश्वव्यापी महामारी सुरु भएको पनि एकवर्ष नाघिसकेको छ । तर, विश्वबाट कोरोना महामारी विस्तारै हराउँदै जाला भन्दा झन नयाँ–नयाँ रुपबाट संक्रमण तिब्र गतिमा फैलिरहेको छ ।

नेपालमा पछिल्लो पटक दैनिक ४ हजारको हाराहारीमा गरिएको नमुना परीक्षणका क्रममा १ सयको हाराहारीमा संक्रमित फेला परेको अवस्था छ । तर, अमेरिका, युरोप, भारत लगायतका केही देशमा पछिल्लोपटक बढ्दै गएको कोरोना संक्रमणले नेपालमा पनि फेरि भयावह रुप लिने हो कि भन्नेमा चिन्ता व्यक्त गरिएको छ ।

भारतमा केही दिनयता कोरोना संक्रमण तिब्र रुपमा बढिरहेको छ । भारतका केही सहरमा पुनः लकडाउन घोषणा गरेर कोरोना संक्रमितहरुको जाँचमा तिब्रता दिनुका साथै कोरोनाको भ्याक्सिनमा पनि बढी जोड दिइएको छ । पछिल्लो अवस्थामा गरिएको एक अनुसन्धानका क्रममा भारतमा एक व्यक्तिले पाँचजनामा कोरोना संक्रमण गराएको तथ्य बाहिर आएको छ ।

भारतमा पछिल्लो २४ घण्टामा झण्डै ४४ हजारको हाराहारीमा संक्रमितहरु फेला परेका छन् । यो तथ्यांक साढे तीन महिना यताकै बढी रहेको बताइएको छ । गत २० नोभेम्बर २०२० मा एकैदिन ४३ हजार १७४ जना संक्रमित भेटिएका थिए । त्यसयता शनिबार सबैभन्दा बढी संक्रमित भेटिएका हुन् ।

भारतको स्वास्थ्य मन्त्रालका अनुसार पछिल्ला दिनमा २२ हजारको हाराहारीमा कोरोना संक्रमित पुष्टि हुँदै गएकोमा शनिबार सबैभन्दा बढी संक्रमित पुष्टि भएका हुन् । साथै शनिबार एकैदिन १९७ जनाको मृत्यु भएको पनि मन्त्रालयले जनाएको छ ।

हाल भारतमा सक्रिय संक्रमितको संख्या ३ लाख भन्दा बढी रहेको छ । तिब्र रुपमा कोरोना संक्रमण बढिरहेको अवस्थामा तीनदिनमा झण्डै १ लाख भन्दा बढी सक्रिय संक्रमित थपिएको बताइएको छ । भारतमा ८ दिनयता कोरोना संक्रमण तिब्र रुपमा बढिरहेको छ । १२ मार्चसम्म १ लाख ९९ हजार २२ जना सक्रिय संक्रमितको उपचार भइरहेको अवस्थामा ८ दिनमै सक्रिय संक्रमितको संख्या ३ लाख ९ हजार ८७ पुगेको हो ।

संक्रमणबाट १ लाख ५९ हजारको मृत्यु

भारतमा हालसम्म १ करोड १५ लाखमा कोरोना संक्रमण पुष्टि भएको छ । ती मध्ये १ करोड ११ लाख संक्रमित निको भइसकेका छन् । कोभिड १९ इण्डिया डट ओआरजीका अनुसार भारतमा १ लाख ५९ हजारले ज्यान गुमाइसकेका छन् ।

त्यसैगरी पछिल्ला दिनमा सबैभन्दा बढी कोरोना संक्रमित हुनेमा महाराष्ट अगाडि देखिएको छ । त्यहाँ शनिबार मात्रै २७ हजार १२६ जना कोरोना संक्रमित थपिएका छन् । कोरोना संक्रमण सुरु भएयता महाराष्ट्रमा एकैदिन २७ हजार बढी संक्रमित थपिएको हालसम्मकै बढी भएको बताइएको छ ।

महाराष्ट्रमा शनिबार २७ हजार १२६ जना संक्रमित भएका छन् भने १३ हजार ५८८ जना निको भएको र ९२ जनाको मृत्यु भएको बताइएको छ ।
महाराष्ट्रमा हालसम्म २४ लाख ४९ हजार जना कोरोना संक्रमित भइसकेका छन् । जसमा १ लाख ९१ हजार सक्रिय कोरोना संक्रमितको उपचार भइरहेको छ । २२ लाख ३ हजार निको भएका छन् । महाराष्ट्रमा मात्रै ५३ हजार ३०८ जनाले ज्यान गुमाएको तथ्यांक रहेको छ ।

महाराष्ट्रमा कोरोना संक्रमण बढ्दै गएपछि युके, युरोप, गल्फ, साउथ अफ्रिका तथा ब्राजिलबाट मुम्बई आउनेहरुलाई ७ दिन क्वारेन्टिनमा राख्नुपर्ने सर्कुलर जारी गरिएको छ ।

यी राज्यमा लकडाउन
कोरोना संक्रमण बढ्दै गएपछि पंजावमा १८ मार्चसम्मका लागि सबै कलेज बन्द गरिनुका साथै परीक्षाहरु पनि रद्द गरिएको छ । पंजाव सरकारको गाइडलाइन अनुसार राज्यमा मेडिकल, नर्सिङ कलेज, बाहेक सबै शैक्षिक संस्थाहरु ३१ मार्चसम्मका लागि बन्द गरिएको छ । सिनेमा हलहरुमा ५० प्रतिशत मात्र राख्न पाउने गरि अनुमति दिइएको छ ।
त्यस्तै मध्येप्रदेशका भोपाल, इन्दौर र जबलपुरमा आइतबार देखि सोमबार ६ बजेसम्मका लागि लकडाउन घोषणा गरिएको छ ।