हामी सबैकाे संसारन्यूज

११ चैत्र, काठमाडौं । बैंक अफ काठमाण्डू लिमिटेडले आफ्नो स्वामित्वमा रहेको आरएमडिसी लघुवित्त र छिमेक लघुवित्तको संस्थापक शेयर विक्री पश्चात बाँडफाँट गरेको छ । बैंकले माघ २७ गतेदेखि चैत ३ गतेसम्म यी दुई कम्पनीको संस्थापक शेयर लिलामी प्रकृयाबाट विक्री खुला गरी चैत १० गते बाँडफाँट गरेको हो ।

आरएमडिसी लघुवित्तको १ लाख ५० हजार कित्ता र छिमेक लघुवित्तको ७ लाख कित्ता शेयर बैंकले लिलामी प्रकृयाबाट विक्री खुला गरेको थियो । तोकिएको अवधिभित्र रितपूर्वक आवेदन दिने आवेदकहरुमध्य बढी रकम अंकित गर्नेलाई बैंकले छिमेक लघुवित्तको ९४ हजार ११० कित्ता र आरएमडिसी लघुवित्तको ५२० कित्ता शेयर बाँडफाँट गरेको जानकारी दिएको छ ।

आरएमडीसी लघुवित्त वित्तिय संस्था लिमिटेडको सेयरमा रितपूर्वक आवेदन दिने आवेदकलाई प्रशोधन गर्दा ५ सय ५० दरसम्म लगानी गर्ने आवेदकलाई माग गरे बमोजिम र छिमेक लघुवित्त वित्तिय संस्था लिमिटेडको ६०१.७५ रूपैयाँदेखि ८५१ दरसम्म लगानी गर्ने बोलपत्रदाताहरूलाई माग गरे बमोजिम नै सेयर बाँडफाँड गरिएको बैंकले जनाएको छ ।

त्यसैगरी, बैंकले बाँडफाँडमा नपरेको सेयर बापतको रकम चैत्र १२ गतेदेखि आवेदकहरुले फारममा उल्लेख गरेका बैंक खातामा पठाउने बैंकले जनाएको छ । बैंकको निष्कासन तथा बिक्री प्रबन्धकको काम बिओके क्यापिटल मार्केट लिमिटेडले गरेको थियो ।